भक्तपुर, ६ माघ २०७८काठमाडौँ उपत्यकाभित्र चल्ने यातायातमा जोरबिजोर प्रणाली लागू गरिएको छ । कोभिड नियन्त्रणका लागि भन्दै प्रमुख जिल्ला अधिकारीहरुको बैठकले यस्तो निर्णय गरेको हो ।
भक्तपुर, ललितपुर र काठमाडौंका प्रमुख जिल्ला अधिकारीहरुको बिहीवार बसेको बैठकले उपत्यकाभित्र चल्ने यातायातमा जोरबिजोर प्रणाली लागू गर्ने निर्णय लिएको भक्तपुर जिल्ला प्रशासन कार्यालयकी प्रमुख प्रशासकीय अधिकृत उर्मिला खतिवडा घिमिरेले पुष्टि गरिन् ।
यो व्यवस्था भोलि(शुक्रवार) राति १२ बजेदेखि चल्ने सवारी साधनहरूमा लागू गर्ने निर्णय गरिएको हो । जोरबिजोर प्रणाली अनुरुप सवारी चलाउन भक्तपुरकी सिडिओ रुद्रादेवी शर्माले आदेश जारी गरेकी छन् । सो आदेश बमोजिम जोर गते जोर नम्बरका सवारी र विजोर गते बिजोर नम्बरका सवारी गुड्न पाउने छन् । यो नियम अत्यावश्यक बाहेक सार्वजनिक र निजी सबै सवारीमा लागू हुने बताइएको छ ।
सिडिओ शर्माले सर्वाजनिकं सवारीमा सिट क्षमता भन्दा बढी यात्रु नराख्न, चालक र सहचालकले अनिवार्य फेस सिल्ड समेत लाउन र मास्क नभएका यात्रु नबसाल्न आदेश गरेकी छन् । त्यसैगरी सार्वजनिक सवारीमा यात्रुले प्रयोग गर्न मिल्नेगरी सेनिटाइजरको व्यवस्था गर्न समेत आदेशमा भनिएको छ ।
बुधवार प्रमुख जिल्ला अधिकारी रुद्रादेवी शर्मा नेतृत्वको टोलीले भक्तपुरका विभिन्न स्थानमा अनुगमन गरी मास्क नलगाउने यातायात व्यवसायी र यात्रुलगायत १ सय ५२ जनालाई कारवाही स्वरुप जरिवाना गरेको थियो ।
