भक्तपुर, ५ फागुन २०७८भक्तपुरकी सहायक सिडिओ सीता परियारले हुम्ला जिल्लाको सिडिओको जिम्मेवारी पाएकी छन् । गृह मन्त्रालयले उनलाई सिडिओको जिम्मेवारी सहित भक्तपुर बाट सरुवा गर्ने निर्णय गरेको हो ।
हुम्लाको सिडिओ भएसंगै उनी दलित समुदायबाट उक्त जिम्मेवारीमा पुग्ने पहिलो महिला बनेकी छन् । भक्तपुरमा सहायक सिडिओ हुनु अघि उनी स्थानीय तहमा प्रमुख प्रशासकीय अधिकृत रहेकी थिइन् ।
शाखा अधिकृतबाट निजामती सेवामा प्रवेश गरेकी कास्कीकी परियार नेपाली काँग्रेसका केन्द्रीय सहसचिव जीवन परियारकी जीवन संगिनी समेत हुन् ।
भक्तपुरमा सिडिओ रुद्रादेवी शर्मा, सहायक सिडिओ सीता परियार, प्रमुख प्रशासकीय अधिकृत उर्मिला खतिवडा र प्रशासकीय अधिकृत समेत महिला रहेको सेटले दैनिक कार्यसम्पादनको अलावा कोभिड १९ को तेस्रो लहर नियन्त्रण र जिल्लाको शान्ति सुव्यवस्था कायम गर्न गरेको कार्यसम्पादन प्रशंसनीय मानिएको छ । यसले पुरुषहरु भन्दा महिला कर्मचारी क्षमतामा कम नभएको पुष्टि भएको देखिन्छ । भक्तपुरमा सहायक सिडिओको जिम्मेवारी सफलतापूर्वक निर्वाह गरेपछि उनी सिडिओ बन्ने योग्यतामा पुगेकी बताइन्छ ।
भक्तपुरको सहायक सिडिओ सीता परियारलाई हुम्ला जिल्लाको सिडिओको जिम्मेवारी सहित सरुवा गरेको गृह मन्त्रालयले उनको ठाउँमा भने बर्दियाबाट प्रेम प्रसाद देवकोटालाई सरुवा गरी ल्याउने निर्णय गरेको बताइएको छ ।