भक्तपुर, ११ फागुन २०७८ राष्ट्रिय लोक गायक एवं कलाकार जयनन्द लामाको रहस्यमय निधन भएको छ । भक्तपुरको मध्यपुरथिमि नगरपालिका वडा नं. १ लोकन्थलीस्थित आफ्नै घर अगाडि उनको शव फेला परेको हो ।
मंगलवार साँझ बैठकका लागि बौद्ध जाने भन्दै घरबाट बाहिरिएका ६६ वर्षीय लामाको शव बुधवार बिहान आफ्नै घर अगाडि फेला परेको महानगरीय प्रहरी परिसर भक्तपुरका सूचना अधिकारी एवं डिएसपी राजु पाण्डेले पुष्टि गरे । घरको गेट अगाडि बिहान७:०५ बजे आफन्तले हेर्दा बा ३ च ७७४१ नं.को मारुती सुजुकी कारमा खुट्टा गाडीमा र शरिर घोप्टो परि टाउको भुईमा जोतिएको अवस्थामा उनको शव फेला परेको डिएसपी पाण्डेले जानकारी दिए ।
सूचना प्राप्त हुनासाथ घटनास्थलमा अनुसन्धान अधिकृत सहितको प्रहरी टोली खटीई गई प्रारम्भिक अनुसन्धान कार्य गरी थप अनुसन्धान कार्य भईरहेको र पोस्ट मार्टमको रिपोर्ट आएपछि अनुसन्धान सजिलो हुने प्रहरीको भनाइ छ ।
सिन्धुपाल्चोकको बाह्र बिसेमा जन्मिएका लामा लोकन्थलीमा बस्दै आएका थिए । पछिल्लो समय टेलिफिल्म हल्का रमाइलोमार्फत कला पस्किरहेका उनी ख्यातिप्राप्त लोकगायक समेत हुन् । उनका लोकगीतहरु पानको पात ,कलकत्ते काइँयो, चुइँ चुइँ चुइँकने जुत्ता, सलल पानी, लौन हजुर के गरौँ नक्कलीलाई पातलीलाई कसरी बे गरुँ , पानीमुनि घुमाउने साँचो, मुलाको चाना उही चाना, केको साँचो डल्ली रेशम लगायत थुप्रै लोकगीतहरु चर्चित छन् ।
