भक्तपुर, ११ फागुन २०७८अमेरिकी सहयोग कम्प्याक्ट एमसीसीको विरुद्धमा नेकपा (माओवादी केन्द्र)को विद्यार्थी संगठन अखिल(क्रान्तिकारी)ले भक्तपुरमा मसाल जुलुस गरेको छ । क्रान्तिकारी विद्यार्थीहरुले भक्तपुरको सानोठिमीस्थित सडकमा मसाल जुलुस गरेका हुन् ।
भोलि बिहीवार संसदमा एमसीसीमाथि छलफलको कार्यतालिका रहेकोले त्यसको विरुद्धमा बुधबार साझ मसाल जुलुस गरिएको अखिल(क्रान्तिकारी) का भक्तपुर जिल्ला उपाध्यक्ष मासबहादुर लामाले बताए । उक्त अवसरमा विद्यार्थीहरुले एमसीसी चाहिदैन देश बेच्न पाइदैन, गो ब्याक एमसीसी लगायतका नारा लगाएका थिए ।
बिहीवार बानेश्वरस्थित संसद भवन घेराउको पूर्वनिर्धारित बिरोध कार्यक्रमको तयारीस्वरुप मसाल जुलुस गरिएको उपाध्यक्ष लामाको भनाइ छ । अखिल(क्रान्तिकारी)ले एमसीसी सम्झौता राष्ट्रघाती भएको भन्दै सम्पूर्ण विद्यार्थीहरु यसको विरुद्धमा आन्दोलित हुनुको बिकल्प नभएको बताएको छ । अखिल(क्रान्तिकारी) भक्तपुरका अध्यक्ष प्रदिप तजले बानेश्वरकेन्द्रीत आन्दोलनमा सहभागी हुन आम विद्यार्थी वर्गमा अपिल समेत गरेका छन् ।
