प्रमुख सत्ता साझेदार दलहरूको बैठकले व्याख्यात्मक टिप्पणीसहित अमेरिकी अनुदान सम्झौता एमसीसीलाई पारित गर्ने निर्णय गरेको छ। प्रमुख सत्ता साझेदार दलहरूको बैठकले व्याख्यात्मक टिप्पणीसहित झन्डै ६० अर्ब रुपियाँ बराबरको अमेरिकी अनुदान सम्झौता एमसीसीलाई प्रतिनिधिसभाबाट पारित गर्ने निर्णय गरेको हो ।

 नेपालको संसदीय इतिहासमै यो पहिलो पटक कुनै सन्धी सम्झौताको व्याख्यात्मक टिप्पणी पेस हुन लागेकोे हो । ‘व्याख्यात्मक घोषणा’ सहित एमसीसी संसदबाट अनुमोदन गर्ने सत्तारुढ दलको निर्णयप्रति अमेरिका समेत सकारात्मक देखिएको छ ।

पहिले एमसीसी अक्षरश: पास हुनुपर्ने अडान राखेको अमेरिका सत्ता साझेदार दलहरुकै असहयोग हुने भएपछि पछि हटेको हो । जनस्तरबाट एमसीसी विरुद्ध आवाज उठिरहेको अवस्थामा अमेरिका नेपाली बुझाइ र आवश्यकता अनुरुप सम्झौतामा सकारात्मक बनेको बताइएको छ । अमेरिका सकारात्मक बनेकाले ‘व्याख्यात्मक टिप्पणी’ सहित सम्झौताका शंकास्पद बुँदाहरुलाई खारेज गरी सम्झौता पास गर्न सत्ता साझेदार दल सहमत भएका हुन् ।