सूर्यविनायक ५ सृजनानगर, कटुन्जेमा निशुल्क स्वास्थ्य शिविर संचालन हुने भएको छ । सोमबार बिहान १० बजेदेखि शिविर संचालन हुन लागेको हो ।

नेपाली काँग्रेस सूर्यविनायक नगर कार्यसमितिको आयोजनामा संचालन हुने उक्त स्वास्थ्य शिविर पार्टीको सृजनानगर, कटुन्जेस्थित कार्यालयसंगै संचालन गरिने जानकारी प्राप्त भएको छ । शिविरमा मुटु तथा कलेजो रोग सम्बन्धी निशुल्क परीक्षण र उपचार गरिने बताइएको छ । समयमै सावधानी नअपनाउदा भयावह बन्ने मुटु र कलेजो रोगबारे जनचेतना जगाउन र स्थानीय जनतालाई आफ्नै दैलोमा स्वास्थ्य परीक्षण र निशुल्क उपचारको अवसर दिलाउन स्वास्थ्य शिविर आयोजना गरिएको आयोजक नेपाली काँग्रेस सूर्यविनायक नगर कार्यसमितिका सभापति निशान ढुंगेलले जानकारी दिए ।

सभापति ढुंगेलका अनुसार शिविरमा मुटु र कलेजोको अवस्थाबारे स्वास्थ्य जांच गरिने प्रवन्ध मिलाइएको छ । शहीद धर्मभक्त राष्ट्रिय मानव अंग प्रत्यारोपण केन्द्रका दक्ष चिकिसक सहितको टोलीले उक्त सेवा दिने उनले बताए । शिविर दिउसो ३ बजे सम्म रहने बताउदै सभापति ढुंगेलले आम स्थानीयलाई स्वास्थ्य शिविरमा आई सेवा लिन र आफ्नो स्वास्थ्यको रक्षा गर्न आग्रह समेत गरेका छन् । थप जानकारीका लागि उनले आफ्नो मोबाइल नम्बर ९८५ ११९४३०४ सार्वजनिक गरेका छन् ।