भक्तपुर, ९ चैत २०७८ भक्तपुरमा औद्योगिक, सांस्कृतिक, पर्यटन तथा व्यापार मेला हुने भएको छ । बिगत वर्षमा कोभिड-१९ का कारण रोकिएको मेलाले यो वर्ष भने निरन्तरता पाउने भएको हो ।
‘नयाँ वर्ष नयाँ सोच, युवाहरुको लागि छ प्रगतिको श्रोत’ भन्ने नाराका साथ नयाँ वर्षको आगमनसंगै भक्तपुरको सल्लाघारीस्थित १०८ रोपनीमा मेला आयोजना गरिने आयोजकले बुधबार एक पत्रकार सम्मेलन मार्फत बताएको छ । औधोगिक शान्ति नेपाल संस्था र मध्यपुर ब्वाईज व्याण्डको आयोजनामा भक्तपुर जिल्लामा छैठौं पटक भक्तपुर औधोगिक सांस्कृतिक पर्यटन तथा व्यापार मेला गर्ने पत्रकार सम्मेलनमा घोषणा गरिएको हो ।
भक्तपुर ऐतिहासिक, सांस्कृतिक एवं पर्यटकीय क्षेत्र भएको र मेलाले यसको प्रचारप्रसारमा सहयोग हुने मेला आयोजक समितिका संयोजक दिपक थापाले जानकारी दिए । उनका अनुसार मेला चैत २४ गतेदेखि बैशाख ४ गतेसम्म संचालन गर्ने तयारी रहेको छ ।
मेलामा २ सय भन्दा बढी स्टल राखिने र करिब ३ लाख भन्दा बढी उपभोक्ताले प्रत्यक्ष अवलोकन गरी सेवा लिने अनुमान आयोजकको रहेको छ । उक्त अवसरमा करिब ८ करोड रुपैयाको कारोबार हुने अपेक्षा गरिएको छ ।
मेलामा बिक्री गरिने सामानहरुमा २० प्रतिशतदेखि ५० प्रतिशतसम्म छुटको व्यवस्थासमेत गरिएको आयोजक संस्था औधोगिक शान्ति नेपालका अध्यक्ष संदीप महतले जानकारी गराएका छन् । मनोरञ्जनका लागि मेलामा बाल उद्यान, रोटे पिङ्ग, रेनजर, मारुती सर्कस, ड्रागन ब्रेक डान्स, नाउँ तथा बच्चाको खेलौना, राष्ट्रिय स्तरका कलाकारहरुको हाँस्य व्यङ्ग्य तथा गीत गायनको विशेष प्रस्तुती रहने बताइएको छ ।
उक्त अवसरमा मेलाका निर्देशक सुनिल बज्राचार्यले मेला विशुद्ध ब्यापारिक उदेश्यले नभई सेवाको भावनाले समेत संचालन गर्न लागिएको बताए । मेलामा एउटै छानामुनी उपभोक्ताले चाहेका हरेक सामाग्रीहरु सहज र सुपथ मूल्यमा उपलब्ध गराईनुका साथै मनोरञ्जन र सामाजिक सेवाका बिबिध कार्यक्रम गरिने बताइएको छ ।