चाँगुनारायण, १८ चैत २०७८भक्तपुरको चाँगुनारायण नगरपालिका वडा नम्बर ९ स्थित ताथली छापमा एक जग्गा प्लटिङको ढिस्को खस्दा दुई जनाको ज्यान गएको छ । शुक्रवार साँझ प्लटिङमा पर्खाल लगाउनेक्रममा ढिस्को खस्दा दुई मजदुरको घटनास्थलमै ज्यान गएको हो ।
ज्यान गुमाउनेमा काभ्रेकाे राेसी गाउँपालिकाका वडा नम्बर ६ का ३४ वर्षीय चतुरसिङ लामा र चाैरी देउराली गाउँपालिका वडा नम्बर ३ का ५० वर्षीय वर्षमान तामाङ रहेका बताइएको छ । महानगरीय प्रहरी प्रभाग सुडालले सुख्खा पहिरोमा परी २ मजदुरको ज्यान गएको जनाएको छ । प्रहरीले मृतकको नाम र ठेगाना पुष्टि गरिसकेको भने छैन ।
सोही दुर्घटनामा परी ज्यान जोगाउन सफल अर्का मजदुर गजबसिंह लामाले जनाए अनुसार पर्खाल लगाउन बेस खन्नेक्रममा सुख्खा पहिरो गई उनीहरुलाई ढिस्कोले पुरेको थियो । उनी त जसोतसो बाचे तर उनले संगै काम गरिरहेका ज्वाई र मामालाई भने बचाउन सकेनन ।
लामाले दुर्घटनाको दोष प्लटिङको साहुनीलाई दिएका छन् । खनेको गहिरो भएन भनेर साहुनीले पैसा नदिने धम्की दिंदै पर्खाल भत्काइदिएपछि शुक्रवार गहिरोगरी खन्ने क्रममा ढिस्को खसेको उनको आरोप छ । काम गरी दुई पैसा होला भनी आएका मजदुर लास बनिसक्दा पनि साहुनी भने फरार भएपछि उनी आक्रोशित बनेका छन् ।
दुर्घटनापछि दुईजनाको घटनास्थलमै ज्यान जाँदा स्थानीय समेत भावुक बनेका छन् । पीडित पारिवारले दोषीलाई कारवाही र उचित क्षतिपूर्तिको मागसहित आन्दोलन गरिरहेका छन् भने उनीहरुले लास उठाउन समेत दिएका छैनन् । उनीहरुको आन्दोलनलाई स्थानीयले साथ् दिइरहेका छन् ।
प्लटिङ गर्ने व्यवसायी चम्पा कुस्मा भने सम्पर्कमा आएकी छैनन् । उनले ताथली छापमा करिब २२ रोपनी जग्गामा प्लटिङ गरेकी छन् । उनी प्रहरीको उच्च अधिकारीकी परिवार भएकी र दुर्घटनामा आफ्नो दोष इन्कार गरिरहेकी भक्तपुर पोस्ट श्रोतले जनाएको छ । स्थानीय भने मजदुरको रगतको मूल्य उनले चुकाउनुपर्ने अडानमा यथावत रहँदा घटनास्थलमा ब्यापक प्रहरी परिचालन गरिएको छ । सो क्षेत्र साँझदेखि नै तनावग्रस्त बनेको छ। ताथलीमा चाँगुनारायण नगरपालिकाका मेयर सोमप्रसाद मिश्रको घर रहेको छ । ताथलीको सो प्लटिङ अबैध रहेको जिकिर गर्दै स्थानीयले भने त्यसलाई नरोकेको भन्दै मेयर मिश्र प्रति पनि असन्तुष्टि व्यक्त गरेका छन् ।