नेकपा(माओवादी केन्द्र)ले भक्तपुर नगरमा गठबन्धन अस्वीकार गरेको छ । भक्तपुर नगरमा प्रमुख र उपप्रमुख सहित सबै वडामा उम्मेद्वारी दिएको माओवादी केन्द्र एक्लै भिड्न लागेको हो ।

गठबन्धनबाट उम्मेद्वारी नदिएर आफ्नै पुरै सेट प्रस्तुत गरेको माओवादी केन्द्रले भक्तपुर नगर प्रमुखमा पुराना नेता तुल्सीभक्त सुवाललाई अघि सारेको छ । भक्तपुरमा किसान आन्दोलनका नेता सुवाल नगरमा एक इमान्दार व्यक्तित्वको रुपमा परिचित छन् । तत्कालीन एकता केन्द्रको जिल्ला सदस्य हुँदै माओवादी केन्द्रसम्म आइपुगेका उनी राजनीति पेशा नभई जनताको सेवाको माध्यम हुनुपर्ने मान्यता राख्दछन । उनले आफू नगर प्रमुख निर्वाचित भए अन्य आयश्रोत नभएका नगरका किसानलाई पेन्सनको व्यवस्था गर्ने र निम्न वर्गका जनताका लागि निशुल्क स्वास्थ्य र निशुल्क शिक्षाको व्यवस्था मिलाउने बताएका छन् । आफूसंग स्थानीय श्रोत साधनको प्रयोग गरी आयमूलक उद्योग संचालन गर्ने र त्यहाँ स्थानीयलाई रोजगारीको ग्यारेन्टी गर्ने स्पष्ट योजना भएको भन्दै जनसास्कृतिक महासंघ भक्तपुरका अध्यक्ष समेत रहेका सुवाल आफू नगरमा जनसास्कृतिक महाविद्यालय संचालन गरी यहाँका कला सस्कृतीलाई अझ ओझपूर्ण बनाउने योजना सुनाउञ्छन । उनी आफूले सबै नगरवासीलाई सही नीतिद्वारा साझा नेतृत्व दिनसक्ने तथा बिचार र आस्थाका आधारमा कसैमाथि विभेद नगर्ने बताउछन ।

उनको उप प्रमुखमा भने इन्द्रमाया सुवालले उम्मेद्वारी दिएकी छन् । जनयुद्धकालीन महिला नेत्री सुवाल दर्जनौं लडाई लडेकी साहसी महिला हुन् । उनले आफूहरु लडेर बनाइएको स्थानीय सरकार स्थानीय जनताको सानो भन्दा सानो समस्या पनि समाधान गर्न सक्ने बन्नुपर्ने बताउदै त्यसैको लागि आफूले उम्मेद्वारी दिएको दावी गरिन । जसको नीति उसैको नेतृत्व हुनुपर्ने भन्दै उनले चेतनशील नगरवासीले माओवादी केन्द्रलाई बिजयी गराउने विश्वास व्यक्त गरिन ।

सुवालद्वयले नगरको प्रमुख र उपप्रमुखमा उम्मेद्वारी दिए पनि गठबन्धनले सबै नगरमा भएको सहमती बिपरितको उम्मेद्वारी फिर्ता लिन आग्रह गरिसकेको छ । गठबन्धनमा सामेल नभई एक्लै दर्ता गरिएको भएपनि भक्तपुरको उम्मेद्वारी फिर्ता नहुने नगर अध्यक्ष राकेश सुवालले जानकारी दिएका छन् । नगरका कार्यकर्ता र माओवादी केन्द्रलाई माया गर्ने मानिसहरुको दबाबका कारण उम्मेद्वारी फिर्ता लिन नसकिएको उनको भनाइ छ ।