भक्तपुर, १५ बैशाख २०७९पूर्वप्रधानमन्त्री एवं नेकपा (माओवादी केन्द्र) का अध्यक्ष पुष्पकमल दाहाल प्रचण्डले मध्यपुर थिमि नगरपालिकामा गठबन्धनको मेयर तथा उपमेयर उम्मेद्वारहरुलाई आवश्यक निर्देशन दिएका छन् । पाँच दलीय गठबन्धनका सुत्रधार समेत रहेका अध्यक्ष प्रचण्डले चुनावी तयारीबारे बुझ्दै आवश्यक निर्देशन दिएका हुन् ।
अध्यक्ष प्रचण्डले बोलाएपछि बिहीवार बिहानै गठबन्धनका तर्फबाट मेयरका उम्मेदवार सुरेन्द्र श्रेष्ठ र उपमेयरका उम्मेदवार विजयकृष्ण श्रेष्ठ प्रचण्ड निवास खुमलटार पुगेका बताइएको छ । उनीहरुलाई पार्टीका केन्द्रीय सदस्यद्वय दिलिप प्रजापति भिष्म र डिपी ढकालले प्रचण्डनिवास पुर्याएका थिए । प्रचण्डले बोलाएपछि मध्यपुरमा गठबन्धनका तर्फबाट मेयर र उपमेयर उम्मेदवारहरु उत्साहित भएका छन् ।
उक्त अवसरमा अध्यक्ष प्रचण्डले वर्तमान गठबन्धनको विरुद्धमा देशीविदेशी शक्तिहरु लागिरहेकाले उनीहरुको भ्रम र प्रहारलाई परास्त गर्दै एकढिक्का भएर चुनावी अभियानमा लाग्न निर्देशन दिएका नेता डिपी ढकालले जानकारी दिए । राजधानीसंगै जोडिएको भक्तपुरको मध्यपुर थिमिका जनता सचेत समाजका प्रतिनिधि पात्र भएका भन्दै अध्यक्ष प्रचण्डले लोकतन्त्र र संविधान रक्षाको लागि जनताले गठबन्धनका उम्मेदवारहरुलाई मतदान गर्ने विश्वास समेत व्यक्त गरे । देशैभर गठबन्धनको पक्षमा जनता खुलेर लागेका जानकारी गराउंदै उनले स्थानीय चुनावले प्रतिगामी र यथास्थितिबादीहरुलाई पाखा लगाउदै लोकतान्त्रिक र अग्रगामी शक्तिलाई स्थानीय सरकारको साँचो सुम्पने दावी गरे ।
व्यवस्था परिवर्तनमा नेपाली काँग्रेस र माओवादी केन्द्रको नेतृत्वदायी भूमिका रहँदै आएको स्मरण गर्दै अध्यक्ष प्रचण्डले वर्तमान गठबन्धन व्यवस्था रक्षाको लागि भएको र सम्पूर्ण मतदातालाई यो कुरा बुझाउनु आवश्यक भएको भनेका थिए ।
स्थानीय कुरा समेत गर्दै अध्यक्ष प्रचण्डले मध्यपुर थिमिमा आफू पटक पटक आइरहेको र यहाँको समस्याबारे जानकार रहेको भन्दै मध्यपुरलाई नमूना नगरपालिकाको रुपमा विकास गर्न आफ्नो र पार्टीको तर्फबाट सक्दो सहयोग गर्ने आस्वासन समेत दिएका थिए ।
पूर्वप्रधानमन्त्री समेत रहेका अध्यक्ष प्रचण्डले निवासमै बोलाएपछि मध्यपुर थिमिमा गठबन्धनका तर्फबाट उम्मेदवार रहेका मेयर सुरेन्द्र श्रेष्ठ र उपमेयर विजय कृष्ण श्रेष्ठ दंग देखिए । भेटपछि थप उर्जा प्राप्त भएको उनीहरुको भनाइ छ । ”अध्यक्षले अगाडी बढ्नुस, मध्यपुरलाई नमूना नगर बनाउन पनि मेरो साथ् रहन्छ भन्नुभएकोले उत्साहित भएर आएका छौं ।” उपमेयर उम्मेदवार विजयकृष्ण श्रेष्ठले बताए ।
मध्यपुर थिमिमा गठबन्धनका तर्फबाट मेयरका उम्मेदवार सुरेन्द्र श्रेष्ठ नेपाली काँग्रेसका निवर्तमान नगर सभापति हुन् भने उपमेयर उम्मेदवार विजयकृष्ण श्रेष्ठ नेकपा(माओवादी केन्द्र)का नगर अध्यक्ष हुन् । अघिल्लो निर्वाचनको अंकगणित हेर्दा मध्यपुर थिमिमा गठबन्धनका उम्मेदवारहरु बलिया रहेका छन् भने सामाजिक व्यक्तित्वको आधारमा समेत उनीहरु बलिया दावेदार हुन् ।