भक्तपुर, १५ बैशाख २०७९पछिल्लो समय भक्तपुरका पत्रकारहरु बैकल्पिक पेशाको खोजीमा देखिएका छन् । जिल्लामा पत्रकारिताको विकास नभएपछि उनीहरु नयाँ विकल्पको खोजीमा निस्किएका हुन् ।
नयाँ वर्षको शुरुकै दिन पत्रकार विकास थापा प्रहरले ब्यवसायिक रुपले त्रिपुरा फूलबारी संचालन गरेको घोषणा गरे । चाँगुनारायण १ दुवाकोटस्थित वडा कार्यालय नजिक रहेको सो फूलवारी बागमती प्रदेशका भौतिक पूर्वाधार विकास मन्त्री कृष्णलाल भडेलबाट एक भब्य कार्यक्रमका बीच औपचारिक उद्घाटन नै गरिएको थियो । नेपाल पत्रकार महासंघ भक्तपुरका कार्यसमिति सदस्य रहेका प्रहर आफू प्रकाशक सम्पादक रही त्रिपुरा न्युज साप्ताहिक संचालन गरिरहेका थिए । कोभिडसंगै पत्रिका वितरण प्रभावित बनेपछि र बजारले खर्च धान्न नसकेपछि उनले नयाँ व्यवसायको रुपमा त्रिपुरा फूलबारी रोजेका हुन् ।
देश निर्वाचनमय हुँदा उनले सामाजिक संजालमा दुखेसो पोखेका छन् की न निर्वाचन कार्यालयले सूचना बिज्ञापन दिन्छ न त उम्मेदवारले । प्रेस काउन्सिल र पत्रकार महासंघ पत्रकारलाई अंकुश लगाएर निगरानी मात्र गर्ने तर केहि नदिने उनले गुनासो गरेका छन् । आयोग,राजनीतिक दल,प्रेस काउन्सिल र पत्रकार महासंघले अाफूलाई उत्तानो टाङ लगाईदिएको आरोप लगाउदै उनले पत्रिका प्रकाशकलाई गाह्रो भएको व्यहोरा सार्वजनिक गरेका छन ।
उनी आफ्नो नयाँ व्यवसाय प्रति भने सन्तोष नै व्यक्त गर्छन । घुम्ने ठाउँ खोज्दै हिड्नेहरुका लागि त्रिपुरा फूलबारी मनोरम गन्तब्य बन्न पुगेको छ । टिकटक बनाउने र फेसबुकलगायतमा फोटो राख्ने रुची भएकाहरुको भीड फूलबारीमा बढ्दै गएको प्रहर बताउछन । फूलबारीमा विभिन्न फूलका बिरुवा उपलब्ध गराइने उनले बताए ।
प्रहरले नयाँ व्यवसाय शुरु गरेको ठिक पन्ध्र दिनमा अर्का पत्रकार अनिल फोजूले पनि आफ्नो व्यवसाय शुरु गरेका छन् । बिहीवार भक्तपुरको कमलविनायकमा उनले प्रि प्रेसको शुभारम्भ गरेका हुन् । उनले आजैबाट डिजाइनिङ्ग र प्रिण्टिङ्गको काम शुरु गरिएको जानकारी दिंदै केही समय भित्रै डिजिटल प्रिण्टिङ्ग र छापाखानाको समेत कार्य गर्ने उद्घोष गरे । छातापोस्ट चलाइरहेका पत्रकार फोजूले पत्रकारिताले जीवन धान्न नसकेपछि प्रेस संचालन गर्नुपरेको बताएका छन् ।
जिल्लामा युवाहरु पत्रकारितामा आकर्षित नभईरहेको अवस्थामा पुराना पत्रकारहरु समेत नयाँ व्यवसाय तर्फ आकर्षित हुन थालेपछि पत्रकारिताको अवस्था सन्तोषजनक मान्न नसकिने नेपाल पत्रकार महासंघ भक्तपुरका सचिव संजीप घिमिरे ‘शुभचिन्तक’स्वीकार गर्दछन । जिल्लामा स्वरोजगारमूलक मिडियालाई बचाउन महासंघले पहल गरिरहेको जिकिर गर्दै उनले पत्रकारिताको विकासबारे दृष्टिकोण प्रस्तुत गर्न स्थानीय तहका उम्मेदवारहरु र तिनका दलहरुलाई आग्रह गर्नुपर्ने आवस्यकता समेत औल्याए । भक्तपुर पोस्टसंग कुरा गर्दै सचिव घिमिरेले भने ”जनताको सूचनाको हकलाई ग्यारेन्टी गर्ने संचार जगत र पत्रकारिताको विकासका लागि स्थानीय सरकार बनाउन खोज्नेहरुले योजना दिनु आवश्यक भएको छ ।” उनले जिल्लामा पत्रकारिताको संरक्षण र विकासका लागि महासंघले छिट्टै ठोस योजना ल्याउने समेत दावी गरे ।
