मध्यपुर थिमि, ३ जेठ २०७९ नेपाली कांग्रेस र नेकपा (माओवादी केन्द्र) को चुनावी गठबन्धनका मेयर र उपमेयर उम्मेदवारहरुले जीत सुनिश्चित गरेका छन् । मत गन्न बाँकी वडाको कूल मत भन्दा मतान्तर बढी भएपछि उनीहरुको जीत सुनिश्चित भएको हो ।
वडा नम्बर ८ को मत परिणामसंगै प्राप्त नतिजा अनुसार गठबन्धनका तर्फबाट मेयर उम्मेदवार नेपाली कांग्रेसका सुरेन्द्र श्रेष्ठले १३ हजार ७ सय ५६ हासिल गर्दा उनका निकटत्तम प्रतिस्पर्धी नेकपा एमालेका उम्मेदवार मदन सुन्दर श्रेष्ठले १० हजार ३ सय ८ मत प्राप्त गरेका छन् । निवर्तमान मेयर समेत रहेका मदनसुन्दर भन्दा ३ हजार ४ सय ४८ मतले अघि रहेका सुरेन्द्रले वडा नम्बर ९ को मतगणना अघि नै जीत हासिल गरिसकेका जानकारी प्राप्त भएको छ ।
त्यसैगरी उपमेयर उम्मेदवार नेकपा (माओवादी केन्द्र) का विजय कृष्ण श्रेष्ठले एमालेकी उम्मेदवार उत्तरा नेपाललाई पछि पार्दै जीत सुनिश्चित गरेका छन् । उत्तराले ८ हजार २ सय १८ मत प्राप्त गर्दा श्रेष्ठले ११ हजार ३ सय ९१ मतसहित जित हासिल गरेका हुन् । उत्तरा भन्दा श्रेष्ठले ३ हजार १ सय ७३ बढी मत प्राप्त गरेका छन् ।
९ वटा वडा रहेको मध्यपुर थिमिमा ८ नम्बर सम्म नतिजा सार्वजनिक भइसकेको छ भने ९ नम्बर वडाको मत गणना भइरहेको छ । यस वडामा कूल २ हजार ७ सय ४७ मत खसेका कारण सो सबै मत प्राप्त गर्दा पनि निकटत्तम प्रतिस्पर्धी मेयर उम्मेदवार मदन सुन्दर र उममेयर उत्तराले नजित्ने निश्चित भएपछि गठबन्धनमा यतिबेला खुशीयाली छाएको देखिन्छ । सामाजिक संजालमा काँग्रेस र माओवादी केन्द्रका नेता कार्यकर्ताहरुले जीतको खुशी साटासाट गरिरहेका देखिन्छन ।