चाँगुनारायण, १० जेठ २०७९ सरकारले ४ जना सचिव सरुवा गरेसंगै भक्तपुरको चाँगुनारायण नगरबासी मणिराम गेलालको खानेपानी मन्त्रालयमा सरुवा भएको छ । मंगलवार बसेको मन्त्रिपरिषद् बैठकको निर्णय अनुसार सचिव गेलालको खानेपानी मन्त्रालयमा सरुवा भएको हो ।
उनी प्रधानमन्त्री तथा मन्त्रिपरिषद्को कार्यालयबाट खानेपानी मन्त्रालयमा पुग्न सफल भएका हुन् । मन्त्रालयको सचिव सरुवामा मन्त्रीहरुको समेत अभिरुची हुने गर्दछ । खानेपानी मन्त्रालयमा काँग्रेसका उमाकान्त चौधरी मन्त्री रहेका छन् । खानेपानीका सुरेश आचार्यलाई प्रधानमन्त्री कार्यालय पुर्याएर गेलाललाई ल्याइएको हो । गेलाल र आचार्य दुवै प्राविधिक समुहबाट सचिवमा बढुवा भएका हुन् । कोटेश्वर निवासी आचार्य नागरिक उड्डयन मन्त्रालयबाट सचिव भएका हुन् ।
सरकारले गेलाललाई खानेपानी मन्त्रालयको सचिवमा सरुवा गर्ने निर्णय गरेपछि भक्तपुर र विशेषगरी चाँगुका स्थानीय उत्साहित भएका छन । खानेपानीको समस्याबाट गुज्रिरहेको भक्तपुरको समस्या समाधानमा गेलालले सहयोग पुर्याउने स्थानीयले सामाजिक संजालमा अपेक्षा गरेका देखिन्छ ।
ओली सरकारको समयमा उर्जा, जलश्रोत तथा सिंचाई मन्त्रालय सम्हालेका गेलाललाई प्रधानमन्त्री तथा मन्त्री परिषदको कार्यालयमा पुर्याइएको थियो । सचिवहरुलाई मन्त्रालयको जिम्मेवारी नदिई थन्क्याउने ठाउँको रुपमा प्रधानमन्त्री तथा मन्त्री परिषदको कार्यालयलाई लिने गरिन्छ ।