भक्तपुर, १३ जेठ २०७९‘माटो जोगाऔं’ भन्ने बिश्वब्यापी अभियानमा भक्तपुर नगरपालिकाका मेयर र उपमेयरले पनि ऐक्यवद्धता जनाएका छन् । ईशा फाउण्डेशनका संस्थापक सद् गुरु जग्गी वासुदेवद्वारा शुरु गरिएको ‘सेभ सोइल’ अर्थात् माटो जोगाऔँ नामक विश्वव्यापी अभियानमा उनीहरुले समर्थन जनाएका हुन् ।
माटो बचाऔं अभियानका केही अभियन्ताहरु भक्तपुर नगरपालिका पुगेका थिए । उक्त अभियानको प्रसंशा गर्दै नगर प्रमुख सुनिल प्रजापति र उपप्रमुख रजनी जोशीले ऐक्यवद्धता जनाएका एक अभियन्ता रिभेकमान मानन्धरले जानकारी गराएका हुन् । अभियन्ता मानन्धरका अनुसार खेतीयोग्य माटोको विनाशबारे चिन्ता व्यक्त गर्दै नगरपालिकाले माटो बचाउन हरसम्भव प्रयास गर्ने उनीहरुले प्रतिवद्धता समेत प्रकट गरेका छन् ।
आफूलाई माटोका मित्रहरू भन्न रुचाउने अभियानकर्ताहरुले माटोको स्वास्थ्यलाई पहिल्यैको अवस्थामा फर्काउनको लागि विश्वभरिका मानिसहरूलाई एकजुट हुन आह्वान गर्दै आएका छन् । खेतीयोग्य माटोमा जैविक पदार्थ बढाउनको लागि सबै राष्ट्रका नेतृत्वकर्तालाई राष्ट्रिय नीतिहरू बनाउन पहल गरिएको विश्वव्यापी अभियानमा सद्गुरुले नेतृत्व गरिरहेका छन् ।”माटो जोगाऔँ अभियान, हाम्रो भूमि र सेरोफेरोका जीवनहरूसँगको प्रेम सम्बन्ध हो— यो कसैसँगको लडाइँ होइन ।” उनको भनाइ छ ।