मध्यपुर थिमि, १७ जेठ २०७९मध्यपुर थिमि नगरपालिकामा नगर कार्यपालिकाको लागि भएको महिला सदस्य निर्वाचनमा सबै नेपाली काँग्रेसका तर्फबाट निर्वाचित भएका छन् । नेपाली काँग्रेसबाट उम्मेदवार रहेका उनीहरु सबै बहुमतका आधारमा निर्वाचित भएका हुन् ।
निर्वाचित हुनेहरुमा गीता विश्वकर्मा, शर्मिला विश्वकर्मा, सरस्वती खड्का, उजाला थापा क्षेत्री र तुइलमाया चक्रधर रहेका छन् ।
नगरपालिका निर्वाचित बहुमत सदस्य कांग्रेसका भएका कारण कार्यपालिकामा काँग्रेस उम्मेदवार निर्वाचित भएका हुन् । कार्यपालिका सदस्यका लागि भएको निर्वाचनमा नेकपा (एमाले)का उम्मेदवारहरुले १३ मत प्राप्त गर्दा काँग्रेस उम्मेद्वारहरु २८ मतसहित विजयी बन्न पुगेका निर्वाचन कार्यालयले जनाएको छ ।
मध्यपुरमा कार्यपालिकामा दलित वा अल्पसंख्यक सदस्य तर्फ नेकपा (माओवादी केन्द्र)का उम्मेदवार वालकृष्ण परियार, काँग्रेसका सरोज परियार र जसे सार्की निर्वाचित भएका छन् । मध्यपुर थिमिमा काँग्रेस र माओवादी केन्द्र गठबन्धन गरेर निर्वाचनमा सहभागी भएका थिए ।
नगरसभाले आफूहरु मध्येबाट नगर कार्यपालिकाका लागि ५ जना महिला सदस्यहरु र दलित वा अल्पसंख्यक समुदायबाट ३ जना सदस्यहरु निर्वाचित गर्ने व्यवस्था छ ।