सार्वजनिक यातायातको समस्या बेहोरिरहेका चाँगुनारायण नगरबासीलाई सार्वजनिक यातायातमा सहज पहुँच पुर्याउन नगरपालिकाले प्रयास थालेको छ । नगर प्रमुख जीवन खत्रीले हरेक वडामा सार्वजनिक यातायातको भरपर्दो सेवा पुर्याउने प्रयास थालेका हुन् ।

राजधानीबाट नजिक भएपनि यातायात सेवामा पिछडिएको चाँगुनारायणका हरेक क्षेत्रमा सार्वजनिक यातायात पहुँच विस्तारका लागि नगर प्रमुख खत्रीले योजना बनाइरहेका छन् । यातायात व्यवसायी समेत रहेका प्रमुख खत्रीले ख्वप भक्तपुर मिनिवस यातायात समितिका पदाधिकारीहरुसँग भेट गरी सार्वजनिक यातायातको पहुँच बिस्तार गर्न सुझाव दिए। उक्त समितिको कार्यालय पुगी प्रमुख खत्रीले नियमित र भरपर्दो सेवा संचालन गर्ने बारे छलफल गरेका उनको सचिवालयले जनाएको छ ।

नगर प्रमुख खत्रीले चाँगुनारायण नगरपालिका भएपनि अधिकाँश स्थान गाउँ नै रहेकाले यातायातको सेवा पुग्न नसक्दा स्थानीयलाई समस्या भैरहेको भनेका छन् । ”विद्यार्थीले समयमा कक्षा भ्याउन हम्मे हम्मे पर्ने मात्र नभई यातायातको सुविधा नहुँदा आफ्नो बारीमा उत्पादन भएका विभिन्न तरकारी एवं बाली बजार सम्म लैजान समेत समस्या छ ।” उनले भने ।

आफू सार्वजनिक यातायातको समस्या निराकरणका लागि नगरका हरेक वडामा यातायात सेवा पुर्याउन लागि परेको उनले प्रष्ट पारे ।

चाँगुनारायणमा हाल उत्तर पूर्वी यातायात, मिनिवस सेवा समिति र १ नम्वर रुटका सार्वजनिक यातायात चल्दै आएका छन् । चाँगुनारायण नगरपालिका वडा नम्वर ३ र ५ मा हाल सम्म नियमित रुपमा सार्वजनिक यातायात संचालनमा आउँन सकेका छैनन भने नगरकोट तथा ताथली बाहेकका बस सेवा भरपर्दो र नियमित हुन सकेका देखिदैनन् ।