![dp dhakal](https://bhaktapurpost.com/wp-content/themes/onlineparda/images/1px.gif)
चाँगुनारायण नगरका स्थानीयबासी समेत रहेका नेकपा (माओवादी केन्द्र) का केन्द्रीय सदस्य डिपी ढकालले चाँगुनारायण ९ ताथलीस्थित विकास निर्माणको अनुगमन गरेका छन् । पार्टीको पहलमा बजेट पारिएको ताथलीस्थित खानेपानी आयोजना र पहिरो नियन्त्रणको उनले अनुगमन गरेका हुन् ।
सोमबार स्थलगत अवलोकनका लागि पुगेका नेता ढकाललाई स्थानीय नेताहरु रामलाल न्हेम्हफुकी, हरेराम खड्का लगायतले निर्माण अवस्थाबारे जानकारी गराएका स्थानीय नेता दिलकुमार बालाले बताए । बालाले बताए अनुसार पार्टीको पहलमा बजेट पारिएको चाँगुनारायण नगरपालिका -९ ताथलीस्थित सौडोलमा करिब ७ करोड लागतको खानेपानी बोरिङ ,सङकलन तथा बितरण आयोजना निर्माणको क्रममा छ । खानेपानी बोरिङ्गको काम यसै आर्थिक वर्षमा सम्पन्न गरिएको छ । सम्पन्न कामको अवलोकन गर्दै नेता ढकालले थप कामका लागि बजेट व्यवस्था हुने बताएका छन् । नेता ढकालले सो आयोजना बाट सौडोलका करिब २ सय घरपरिवारको खानेपानी समस्या समाधान हुने भएकोले आफूहरुले प्राथमिकतापूर्वक अघि बढाएको बताए ।
त्यसैगरी ताथलीमै पहिरो नियन्त्रणको लागि ३ ठाउँमा गरी ७५ लाख बढी बजेटको काम निरीक्षण गर्दै नेता ढकालले गत बर्षामा पहिरो जोखिममा पर्दा त्रिपाल बोकेर पुगेको स्थानमा यो वर्ष पहिरो रोकथामको स्थायी संरचना बनेको पाउँदा सन्तोष व्यक्त गरेका छन् । ”गत वर्ष जादाँ स्थायी समाधान गर्ने बाचा गरिएको थियो । आज त्यो वचन पूरा भएको हेर्दा खुशी लागेको छ ।” अवलोकन पछि उनले भने । पार्टीको पहलमा ताथलीको नयाँ बस्तीमा विद्युतीकरणको काम समेत सम्पन्न गरिएको प्रति उनले सन्तोष व्यक्त गरे ।
मतादेश जे भए पनि बिकास निर्माण कार्य र जनताको समस्या समाधानमा माओवादी केन्द्र निरन्तर लागिरहने नेता ढकालको भनाइ छ । उनले संसदीय राजनीतिमा अनेक कारण जनमत प्रभावित हुने हुँदा यसैको आधारमा आफूहरु निरास नहुने र जनसेवामा निरन्तर लागिरहने प्रतिक्रिया दिएका छन् । नेता ढकालसंग वाइसिएल जिल्ला सचिव सरराज उप्रेती, वाइसिएल नगर अध्यक्ष लक्ष्मण दुलाल लगायत सहभागी रहेका थिए ।