भक्तपुर, २ असार २०७९ प्रतिनिधिसभाको आजको बैठकमा प्रधानमन्त्री शेरबहादुर देउवा र अर्थमन्त्री जनार्दन शर्माले बजेटमाथि उठेका प्रश्नहरुको बारेमा जवाफ दिने सम्भावित कार्यसूची सार्वजनिक भएको छ । संसद बैठक अहिले केहिबेरमा बोलाइएको छ ।
अर्थमन्त्री जर्नादन शर्माले भने बजेटमा उठेका प्रश्नहरुको जवाफ दिने कार्यक्रमको एमालेले प्रतिवाद गर्ने जनाएका छन् । अर्थमन्त्रीले बजेट तयार पार्ने क्रममा अर्थमन्त्रालयमा अनाधिकृत व्यक्तिहरू प्रवेश गराएर कर, राजश्व र भन्सारका दर निर्धारण गरेको आरोप एमालेले लगाउँदै आएको छ । यही आरोपमा एमालेले मंगलबार संसदको बैठक अवरोध गरेको थियो भने, त्यसयता अर्थमन्त्रीले गर्ने टिप्पणीमा विरोध गर्ने जनाउँदै आएका छन् ।
यधपी, अर्थमन्त्री शर्माले भने आफुमाथि प्रतिपक्षले आरोप लगाउने विषय नपाएर गलत आरोप लगाएको बताएका छन् । उनले मन्त्रालयबाटै त्यसको औपचारिक खण्डन समेत गरिसकेका छन् । तर एमालेले भने अर्थमन्त्रीले कि राजीनामा दिनुपर्ने नभए संसदीय छानबिन समिति गठन गर्नुपर्ने माग गरेको छ । त्यसो नभएसम्म प्रमुख प्रतिपक्षीले संसद् अवरोध गर्ने एमालेका प्रमुख सचेतक विशाल भट्टराईले बताए ।