सूर्यविनायक, ३ असार २०७९सूर्यविनायक नगरपालिकाले नीति तथा कार्यक्रम र बजेटबारे सुझाव संकलनलाई तिब्रता दिएको छ । नगरपालिकाले सरोकारवालासंग सुझाव संकलन गरेको हो ।
शुक्रवार जिल्ला र नगर क्षेत्रमा रहेर पत्रकारितामा क्रियाशील संचारकर्मीसंग सुझाव लिने क्रममा नगर प्रमुख बासुदेव थापाले सबै सरोकारवाला सस्था, समूह, संगठन लगायतसंग सुझाव लिने कार्य भैरहेको जानकारी गराएका हुन् । शिक्षक, स्वास्थ्यकर्मी, प्याब्सन, कृषक लगायतको प्रतिनिधित्व हुनेगरी सुझाव लिईसकिएको उनको भनाइ छ ।
आगामी आर्थिक वर्ष २०७९/८० का लागि कस्तो नीति लिने र कस्ता कार्यक्रमलाई प्राथमिकता दिने भन्ने विषयमा केन्द्रीत रहेर सुझाव संकलनको कार्य गरिरहेको नगर प्रमुख बासुदेव थापाले बताएका छन् । सर्वसाधारणले समेत यसबारे नगरपालिकामा प्रत्यक्ष आएर वा, इमेलईन्टरनेट र टेलिफोन लगायतका माध्यमबाट सुझाव दिन सक्ने बताइएको छ। नगर प्रमुख थापाले सबैलाई समेटेर उत्कृष्ट नीति तथा कार्यक्रम ल्याउने उद्घोष समेत गरेका छन् । उक्त अवसरमा नगरपालिकाका प्रवक्ता एवं वडा नम्बर ७ का वडाध्यक्ष रविन्द्र सापकोटा, प्रमुख प्रशासकीय अधिकृत लगायतले नगरपालिकाको आगामी नीति तथा कार्यक्रम र बजेटबारे गरिरहेका कार्यबारे जानकारी गराएका थिए ।
सूर्यविनायक नगरपालिकाले असार ९ र १० गते ११ औं नगर सभा मार्फत यसलाई सार्वजनिक गर्ने कार्यतालिका रहेको जानकारी गराइएको छ ।