भक्तपुर, ३ असार २०७९भक्तपुरका युवा समाजसेवी एवं उद्यमी दिल कुमार बाला राष्ट्रिय युवा प्रतिभा तथा उद्यमी संजालको केन्द्रीय सचिव निर्वाचित भएका छन् । चाँगुनारायण-९ ताथली निवासी युवा नेता दिलकुमार बाला शुक्रबार सो पदमा निर्वाचित भएका हुन् ।
नेपाल सरकारको युवा तथा खेलकुद मन्त्रालय अन्तर्गत गठन गरिएको युवा प्रतिभा तथा उद्यमी संजाल पुनर्गठन गर्दा बाला सचिव निर्वाचित भएका बताइएको छ ।
संजालको अध्यक्षमा लोचन बस्नेत उपाध्यक्षमा खुल्ला तर्फ राजन गौतम, समावेशी तर्फ उपाध्यक्षमा सुलोचना श्रेष्ठ र सचिवमा दिलकुमार बाला गरी २५ सदस्यीय समिति निर्विरोध निर्वाचित भएको युवा परिषदले पुष्टि गरेको छ । नवनिर्वाचित कार्यसमितिलाई परिषद अध्यक्ष सुरेन्द्र बस्नेत लगायत पदाधिकारी एवम् कार्यालय प्रमुख रमाकान्त शर्मा लगायतले आवश्यक मार्गनिर्देशन दिएका थिए ।
राष्ट्रिय युवा परिषद अन्तर्गत रहेको उक्त संजालको प्रदेश, जिल्ला र पालिका तह सम्म बिस्तारित संगठन संरचना रहेको छ । युवा प्रतिभाको पहिचान र विकास गर्ने तथा उद्यमशीलता प्रवर्द्धन गर्ने उक्त संजाललाई युवा परिषदले महत्वका साथ बिबिध कार्यक्रमको जिम्मा दिने गर्दछ । संजालको केन्द्रीय सचिव भए संगै युवा उद्यमी बालाले युवाहरुको समग्र हितलाई केन्द्रमा राखी क्रियाशील रहने प्रतिक्रिया दिएका छन् । युवा परिषदले लिएको लक्ष अनुरुप कार्यसम्पादन गर्ने उनको भनाइ रहेको छ । विभिन्न सामाजिक संघसस्थामा रहेर समाजसेवामा सक्रिय बाला साहित्यमा समेत रुचि राख्दछ्न । नेकपा (माओवादी केन्द्र) का युवा नेता बाला इभेन्ट म्यानेजमेन्ट, क्याटरिङ र होटेल ब्यवसायमा आवद्ध रहेका छन् । चाँगुनारायण उद्योग बाणिज्य संघको कार्यसमितिमा समेत रही उनले नेतृत्व गरिरहेका छन् ।