भक्तपुर, ८ असार २०७९भक्तपुर नगरपालिकाले आयुर्वेद उपचार सेवालाई वडा वडामा बिस्तार गर्ने नीति तथा कार्यक्रम सार्वजनिक गरेको छ । १२ औं नगर सभामा नीति तथा कार्यक्रम पेश गर्दै नगर प्रमुख सुनिल प्रजापतिले आयुर्वेद उपचार सेवालाई वडा वडामा बिस्तार गर्ने बताएका हुन् ।
आर्थिक वर्ष २०७९/८० का लागि सार्वजनिक नीति तथा कार्यक्रममा नगरपालिकाले नगरबासीका लागि निशुल्क रगत उपलब्ध गराउने समेत उल्लेख गरिएको छ । रगत आवश्यक पर्ने बिरामीलाई निशुल्क रगत उपलब्ध गराउने नीति तथा कार्यक्रममा उल्लेख गरिएको हो ।
त्यसैगरी प्रत्येक वडामा चिकित्सकसहितको स्वास्थ्य उपचार केन्द्रहरुको विस्तार गरी सर्व सुलभ स्वास्थ्य उपचार सेवा प्रदान गर्ने व्यवस्था मिलाइने निती तथा कार्यक्रममा भनिएको छ । ख्वप अस्पतालमा प्रसुती सेवा संचालन गर्ने देखि जनताको घरदैलोमा पुगेर स्वास्थ्य शिविर संचालन गर्ने समेत बताइएको छ ।
हेर्नुस भक्तपुर नगरपालिकाको नीति तथा कार्यक्रममा स्वास्थ्य
ख्वप अस्पताललाई सुविधासम्पन्न अस्पतालको रूपमा विकास गर्न यही वर्षदेखि सिटी स्क्यान सेवा सञ्चालनमा ल्याइनेछ र आवश्यकताअनुसार बिशेषज्ञ सेवा थप्दै लगिने छ । ख्वप अस्पतालमा प्रसुती सेवा सञ्चालन गरिनेछ ।
वडा—वडामा चिकित्सकसहितको स्वास्थ्यउपचार केन्द्रहरूको विस्तार गरी सर्वसुलभ स्वास्थ्य उपचार सेवाको व्यवस्था मिलाइनेछ ।
घरदैलो नर्सिङ सेवालाई थप प्रभावकारी बनाउँदै लगिनेछ । घरदैलोमा खटिने नर्स र स्वास्थ्य स्वयम्सेविकाहरूमार्फत नगरबासीहरूको स्वास्थ्य विवरण (प्रोफाइल) तयार गरिनेछ ।
स्वास्थ्य विशेषज्ञहरूसहितको स्वास्थ्य टोलीबाट समय—समयमा नागरिकहरूको स्वास्थ्य परीक्षण शिविरको व्यवस्था मिलाइनेछ ।
वडा—वडामा परिचालित स्वास्थ्य स्वयम्सेविकाहरूलाई प्रोत्साहित गर्दै सामाजिक कार्यकर्ताको रूपमा विकास गर्ने नीति लिइनेछ ।
गम्भीर रोग लागेका बिरामीहरूलाई दिइँदै आएको आर्थिक सहयोग रकमलाई निरन्तरता दिइनेछ । मृगौला, क्यान्सर र मेरुदण्ड पक्षघात भएका बिरामीहरूलाई नेपाल सरकारले तोकेबमोजिम मासिक भत्ताको व्यवस्था गरिनेछ ।
नागरिकहरूलाई स्वास्थ्य बीमामा सहभागी हुन प्रोत्साहित गरिनेछ ।
विद्यार्थीहरूको स्वास्थ्यलाई ध्यानमा राखी ख्वप अस्पतालका चिकित्सकहरूमार्फत समय—समयमा शैक्षिक संस्थाहरूमा स्वास्थ्य शिविर सञ्चालन गरिनेछ ।
ख्वप अस्पतालबाट निःशुल्क रूपमा प्रदान गर्दै आएको अक्सिजन वितरणलाई निरन्तरता दिइनेछ ।
आयुर्वेदिक उपचार सेवालाई वडा—वडामा विस्तार गर्दै लगिनेछ ।
रगत आवश्यक पर्ने बिरामी नगरबासीहरूको लागि निःशुल्क रगतको व्यवस्था गरिनेछ ।