सूर्यविनायक नगरपालिकाले आफ्ना स्थायी बासिन्दाका लागि नगर अस्पतालमा १५ प्रतिसत छुटको घोषणा गरेको छ । बिहीबार ११ औं नगर सभामा नगरपालिकाको नीति तथा कार्यक्रम सार्वजनिक गर्दै नगर प्रमुख बासुदेव थापाले उक्त घोषणा गरेका हुन् ।                                                                                                                                    आर्थिक वर्ष २०७९/८० का लागि प्रस्तुत नीति तथा कार्यक्रममा नगरपालिकाले वडा नम्बर ८ जगातीस्थित नगर अस्पताललाई विशेषज्ञ सेवा सहित नमूना अस्पताल बनाउने समेत नीति लिइएको छ  । त्यस्तै, स्वास्थ्य बीमालाई अझ बढावा दिदै बीमा बापत लाग्ने शुल्कमा प्रति परिवार रु १ हजार नगरपालिकाले ब्यहोर्ने कार्यक्रमलाई निरन्तरता दिइने बताइएको छ ।                                                                                                    नि:शुल्क वितरण हुने ९८ प्रकारका औषधी नगरपालिका मातहतका स्वास्थ्य सस्थाबाट सहज बितरणको ब्यवस्था मिलाइने समेत घोषणा गरिएको छ ।  त्यसैगरी मानसिक स्वास्थ्यका बिरामीलाई आवश्यक सहयोग प्रदान गर्ने समेत प्रतिवद्धता प्रस्तुत गरिएको छ ।                                                                                                                                 सांसद महेश बस्नेतको अध्यक्षतामा जगातीस्थित एक होटलमा  नगर सभा जारी छ । कार्यक्रममा बागमती प्रदेश सभाकी राज्यमन्त्री रजनी अमात्य जोन्छे, जिसस प्रमुख ईश्वरबहादुर थापा लगायतको आतिथ्यता रहेको छ ।