पेट्रोलियम पदार्थको मूल्यबृद्धि बिरुद्ध युवा संघ भक्तपुरले मसाल जुलुस गरेको छ । शुक्रबार साँझ प्रमुख प्रतिपक्षी दल नेकपा (एमाले)को भातृ संगठन युवा संघ नेपालको युथ फोर्सले सूर्यविनायकस्थित मूख्य सडकमा मसाल जुलुस गरेको हो ।              एमाले पार्टी कार्यालय नजिकबाट शुरु भएको मसाल जुलुसले छ लेन सडक हुदै सूर्यविनायक चोक परिक्रमा गरेको थियो । मसाल जुलुस गर्न नदिन एक ट्रक प्रहरी परिचालित भएपनि मसाल खोस्न सकेनन् । जुलुस बिथोल्न नसकी प्रहरी जुलुसको पछि लाग्दा मसाल जुलुसलाई प्रहरीले सुरक्षा दिइरहेको झै देखिन्थ्यो ।  मसाल जुलुसका कारण केहिबेर हाइवे अवरुद्ध हुन पुगेको थियो भने सरकारी सवारीलाई युवाहरुले फर्काएका थिए ।                                                                               मसाल जुलुस कोण सभामा परिणत भएपछि भने प्रहरी मसाल निभाउन सफल भएको थियो । कोणसभालाई सम्बोधन गर्दै युवा संघका भक्तपुर उपाध्यक्ष एवं युथ फोर्सका अध्यक्ष रविन थापाले पेट्रोलियम पदार्थको मूल्य वृद्धि फिर्ता नभए सम्म युवाको आन्दोलन नरोकिने उद्घोष गरेका छन् । उक्त अवसरमा सरकार र प्रधानमन्त्री बिरुद्ध युथ फोर्सका कार्यककर्ताले चर्को नाराबाजी समेत गरेका थिए । युवाहरुको मसाल जुलुसमा साथ दिन एमाले नेताहरू मोहनविर श्रेष्ठ, रजन केसी, दिनेश थापा, अशोकराज ढुङ्गेल लगायत जिल्ला नेताहरु सडकमा ओर्लिएका देखिन्थे ।