भक्तपुर, १२ असार २०७९भक्तपुरको वडा नम्बर १ मा एक व्यस्त सडक हिलाम्मे हुँदा स्थानीय सास्ती व्यहोर्न बाध्य बनेका छन् । कामकाजी मानिस र विद्यार्थीका लागि यो बाटो टाउको दुखाइको विषय बनेको छ ।
दुधपाटीस्थित बारुण यन्त्र कार्यालय पछाडिको बाटो वर्षाका कारण हिड्नै नसक्ने गरी हिलाम्मे भएको हो । सोही बाटो गरेर दिनहुँ सयौं विद्यार्थी आवतजावत गर्नुपर्ने भएपनि बाटोको मरम्मत हुन सकेको छैन ।
स्थानीय अगुवा विनयराज रेग्मीले शहरी विकास विभागले बाटो बनाउने भन्दै इट्टा उप्काएर झन् बिजोग बनाइदिएको बताएका छन् । महिनौ बितिसक्दा पनि बाटोमा छाप्ने ढुंगा नपाइएको बहानामा काम रोकिंदा बालबालिका बाटो पार गर्न छेउको पोखरीको भिरालो पर्खालबाट हिड्नु पर्ने बाध्यता बारे बताउदै उनले दुई पाङ्ग्रे सवारी गुडाउन समेत नसक्ने गरी बाटो बिग्रिएको गुनासो गरे । कार्यालय जान चिटिक्क परेर घर बाट निस्किएका स्थानीय बाटोमा हिलाम्मे हुनुपर्दा निरास देखन्छन ।
वडा नम्बर १ का वडाध्यक्ष श्याम कृष्ण खत्रीले भने बाटो बनाउने काममा वडा कार्यालय लागिरहेको जनाएका छन् । स्थानीयको दुखबारे आफूहरुलाई जानकारी रहेको भन्दै उनले केही दिन भित्रै बाटो बनिसक्ने र स्थानीयको समस्या समाधान हुने दावी गरे ।
