भक्तपुर, १२ असार २०७९भक्तपुर नगरपालिकाको बजेट समाजवाद उन्मुख भएको भन्दै सभासदहरुले सन्तोष व्यक्त गरेका छन् । १२ औं नगर सभामा नगरपालिकाको बजेट माथि दफावार छलफल सहभागी हुँदै सभासदहरुले सन्तोष व्यक्त गरेका हुन् ।
प्रमुख सुनिल प्रजापतिको अध्यक्षतामा आइतवार बसेको १२ औं नगरसभामा ५ जना सभासद्हरुले आफ्नो विचार व्यक्त गरेका बताइएको छ ।
छलफलमा भाग लिँदै सभासद् हरिरत्न गोर्खालीले नपाको बजेट समाजवाद उन्मुख भएको बताउदै वडास्तरीय योजनामा छुट्याइएको रकम समय अनुसार वृद्धि गर्नुपर्ने बताए । हेरा ख्याजुले संघ र प्रदेशको बजेट समयमै प्राप्त गर्न पहल गर्नुपर्ने, महेश्वरी खेलमैदानको लागि छुट्याएको बजेट अपुग भएको उल्लेख गरे ।
त्यस्तै सभासद् पुरुषोत्तम तमखुले इखालाछी मठ पुनःनिर्माणको लागि छुट्याएको बजेट कम भएको, सभासद् जितेन्द्र मुनंकर्मीले नपाले आर्थिक स्रोत बढाउनेतर्फ ध्यान दिनुपर्ने, त्यस्तै सभासद् रामसुन्दर बासीले भौतिक निर्माणमा जोड दिनुपर्ने, नपाले मानसिक रोग विशेषज्ञको व्यवस्था गर्नुपर्ने, सामुदायिक विद्यालयमा भौतिक सुधार गर्न बजेट छुट्याउनुपर्नेमा जोड दिए ।
त्यस्तैसभाको विशेष समयमा सभासद्हरु रामसुन्दर बासी, गंगालक्ष्मी बमनु, कल्पना शिल्पकार, पुरुषोत्तम तमखू, इन्द्रबहादुर प्याठले देशघाती एमसीसी सम्झौता र एसपीपी सम्झौताबारे जनतालाई सचेत पार्नुपर्ने, सिद्धपोखरी वरिपरि हरियाली प्रवद्र्धन गर्नुपर्ने, घरभाडा कर उठाउनुपर्ने, देको मिवा इतापाके आवास योजना छिटो सम्पन्न गर्नुपर्ने, नगर प्रहरीको व्यवस्था गर्नुपर्ने धारणा राखेका थिए ।
सभासद् कृष्णगोपाल चौगुठी, हेरा ख्याजु, श्यामसुन्दर मातां, नारायणप्रसाद त्वानाबासु, कृष्णनारायण दुमरु, सूर्यप्रसाद श्रेष्ठ, मञ्जुमैया लाखा, सिद्धिराम अवाल, जितेन्द्र मुनंकर्मी र गोविन्द दुवालले समसामयिक विषयमा आ–आफ्नो धारणा राख्नुहुँदै हनुमानघाट सुधारको योजना ल्याउनुपर्ने, भनपा ७ स्थित पाँचाख्योमा हरियाली प्रवद्र्धन गर्नुपर्ने, सडक बत्ती मर्मत सम्भार गर्नुपर्ने, साना र दुई पांग्रे सवारीसाधन पार्किङ व्यवस्था गर्नुपर्ने, नगरकोट सडकको दायाँबायाँ पेटी बनाउनुपर्ने, नगरबासीहरुलाई सरुवा रोगबाट बचाउन खानेपानीको फिल्टरको व्यवस्था गर्नुपर्ने बताए ।
नगरसभाको अर्को बैठक २०७९ साल असार १४ गते, मंगलबार दिनको १ बजे बस्ने गरी स्थगित भएको नगर प्रमुखको सचिवालयले जनाएको छ ।