भक्तपुर, १५ असार २०७९भक्तपुर नगरपालिकाको आयोजनामा भएको पाक्षिक सरसफाइ कार्यक्रम अन्तर्गत भक्तपुर हस्तकला (प्रेस) औद्योगिक क्षेत्रमा सरसफाइ कार्यक्रम सम्पन्न भएको छ । बुधबार उक्त क्षेत्रमा सरसफाई गरिएको हो ।
कार्यक्रममा वातावरण समितिका सयोजक तथा ९ नं वडाका वडा अध्यक्ष रविन्द्र ज्याख्वले सरसफाई लाई नगरपालिकाले महत्वका साथ् अघि बढाएको बताए । उनले आगामी आर्थिक वर्षमा भक्तपुर नगरपालिकाले सरसफाईको लागि १३ करोड ५० लाख बजेट बिनियोजन गरिएको समेत जानकारी दिए। ठुलो धनराशी सरसफाई व्यवस्थापनमा लगाउनुपरेकोले फोहोरलाई मोहर बनाउने नगरपालिकाले नीति लिएको उनले खुलासा गरे । सकेसम्म कम फोहोर गर्न र घरमै फोहोर व्यवस्थापनको लागि तालिमहरु प्रदान गरिरहेको उनले बताए ।
हरेक सम्पदा क्षेत्र, पोखरीको सरसफाइ कार्य खुल्ला अभियानका रुपमा लामो समयदेखि चलाउदै आएको र कोभिडको कारणले स्थगित भएकोले पुन कार्यक्रमलाई निरन्तरता दिएको उनले बताएका छन् । काठमाडौ उपत्यकामा हैजाको संक्रमण देखापरेकोले सतर्क हुनुपर्ने समेत उनको सुझाव रहेको छ ।
कार्यक्रममा जनप्रतिनिधि, शिक्षक, कर्मचारी, सहकारीकर्मी तथा स्थानीयको उपस्थिती रहेको थियो ।
।