भक्तपुर,१८ असार २०७९जिल्ला प्रशासन कार्यालय भक्तपुरले सेवा प्रवाहलाई सहज बनाउने उदेश्यले स्थानीय सरकारसंग अन्तरक्रिया कार्यक्रमलाई अघि बढाएको छ । शुक्रवार सूर्यविनायक नगरपालिकाका जनाप्रतिनिधिसंग कार्यालयले अन्तरक्रिया सम्पन्न गरेको हो ।
जिल्ला प्रशासन कार्यालयले प्रवाह गर्ने सेवा स्थानीय तह संग समेत अन्तर सम्बन्धित हुने भएकोले अन्तरक्रिया कार्यक्रम आयोजना गरिएको सिडिओ रुद्रादेवी शर्माले प्रष्ट पारिन । सिडिओ कार्यालयमा आउने कतिपय सेवाग्राहीका कागजपत्र प्रमाणित गर्ने, सिफारिस गर्ने लगायतका काम स्थानीय जनप्रतिनिधिको भएकोले सिडिओ कार्यालय र नगरपालिकाबीच राम्रो समन्वय हुनुपर्ने उनको भनाइ छ । सिडिओ शर्माले प्रक्रिया, कानुन र आवस्यक कागजातबारे जनप्रतिनिधिले सहि जानकारी राख्नुपर्नेमा जोड दिदै यसले जनताको काममा सहजता हुने र सिडिओ कार्यालय आएपछि कागजपत्रको कमीका कारण फर्कनु पर्ने अवस्था अन्त्य हुने विश्वास व्यक्त गरिन् ।
उक्त अवसरमा सिडिओ शर्माले शान्ति सुरक्षा, लागू औषध नियन्त्रण र अपराध न्यूनीकरण र जिल्ला प्रशासन कार्यालयले दिने सेवा बारे अभिमुखीकरण हुने गरी स्लाइड प्रस्तुतीकरण गर्दै जनप्रतिनिधिले राखेका प्रश्नबारे प्रष्ट पारेकी थिइन् ।
कार्यक्रममा सूर्यविनायक नगरपालिकाकी उपप्रमुख सरिता तिम्सिना भट्टराईको नेतृत्वमा १० वटै वडाका वडा अध्यक्षहरू र प्रमुख प्रशासकीय अधिकृत राजेन्द्रप्रसाद कँडेलको नेतृत्वमा १० वटै वडाका वडा सचिवहरुको सहभागिता रहेको थियो । नवनिर्वाचित जनप्रतिनिधिका लागि कार्यक्रम असाध्यै फलदायी भएको भन्दै जान्प्रतिनिधिहरुले कार्यक्रमबाट धेरै विषयमा थाहा पाउने र स्पष्ट हुने अवसर प्राप्त भएको प्रतिक्रिया दिए ।
