भक्तपुर, १९ असार २०७९नेपाली कांग्रेस भक्तपुरका सभापति दुर्लभ थापा अमेरिका पुगेका छन् । गैरआवासीय नेपाली महासंघ अमेरिकाको ११औं सम्मेलन र तेस्रो ‘नलेज कन्भेन्सन’मा सहभागी हुन उनी अमेरिका पुगेका हुन् । नेपाली कांग्रेसका महामन्त्री विश्वप्रकाश शर्माको नेतृत्वमा थापाले सम्मेलनमा भाग लिइरहेका छन् । सम्मेलन अमेरिकाको नर्थ क्यारोलिना राज्यमा दुई दिनसम्म चल्ने कार्यक्रम रहेको छ । करिब एक साता सभापति थापाले अमेरिकामा बिताउने कार्यतालिका रहेको छ । उक्त अवधीसम्मका लागि भक्तपुर सभापतिको कार्यवाहक जिम्मेवारी सभापति दुर्लभ थापाले उपसभापति उर्मिला बनलाई दिएका छन् । सम्मेलनमा विज्ञान र प्रविधि, दिगो कृषि र प्राकृतिक स्रोत व्यवस्थापन, नेपालमा लगानीको क्षेत्र र संगठित लगानी, मास मिडिया र सामाजिक सञ्जाल, सामाजिक विज्ञान र लोककल्याण, महिला, युवा र नेपाली संस्कृति, प्रविधि र पूर्वाधारलगायत ११ फरक विषयमा विज्ञहरूले कार्यपत्र प्रस्तुत गर्ने कार्यक्रम रहेको आयोजकले जनाएको छ ।