भक्तपुर, २३ असार २०७९ नेकपा (माओवादी केन्द्र) का अध्यक्ष प्रचण्डले १ सय २५ सदस्यीय पोलिटब्यूरो प्रस्ताव गरेका छन् । काठमाडौमा जारी केन्द्रीय कमिटी बैठकमा उनले पोलिटब्यूरो सदस्यको नाम प्रस्ताव गरेका हुन् ।
बिहीबार केन्द्रीय कमिटी बैठकमा अध्यक्ष प्रचण्डले प्रस्ताव गरेका पोलिटब्यूरो सदस्यमा भक्तपुर इन्चार्ज दिलिप कुमार प्रजापति भिष्म पनि परेका छन् । जनयुद्धकालीन नेता भिष्म मध्यपुर थिमिका बासिन्दा हुन् । उपत्यकामै माओवादी केन्द्रले मध्यपुर थिमीमा मात्र आफ्नो उम्मेदवारलाई उप प्रमुख निर्वाचित गर्न सफल भएपछि नेता प्रजापतिले त्यसको जस पाउँदै आएका छन् ।
केन्द्रीय कमिटी बैठकमा १ सय २५ सदस्यीय पोलिटब्यूरो सदस्यको नाम पढेका पार्टी अध्यक्ष प्रचण्डप्रति धेरै नाम छुटेको भन्दै बैठकमै असन्तुष्टहरुले बिरोध जनाएपछि ३१ वैकल्पिक सदस्य थप्ने समेत प्रस्ताव राखिएको एक सहभागीले बताए । ”केन्द्रीय कमिटीमा वैकल्पिक सदस्य व्यवस्था गरेजस्तै पोलिटब्यूरोमा पनि वैकल्पिक सदस्य थप्ने प्रस्ताव अध्यक्ष प्रचण्डले गर्नुभएको छ ।” एक केन्द्रीय सदस्यले भक्तपुर पोस्टसंग भने ।