भक्तपुर, २६ असार २०७९‘सरकारी काम कहिले जाला घाम’ भन्ने भनाइ सरकारी कर्मचारीले काम नगर्ने अर्थमा प्रख्यात छ । तर, भक्तपुरमा भने यसलाई चुनौती दिँदै एक दर्जन बढी कर्मचारी सार्वजनिक बिदालाई समेत माया मारेर आइतबार दिनभर काममा खटिएका छन् ।
जिल्ला प्रशासन कार्यालय भक्तपुरकी प्रमुख जिल्ला अधिकारी रुद्रादेवी शर्माले स्थानीय सरकारलाई सेवा सम्बन्धी अभिमुखीकरण गर्ने उदेश्यले कार्यक्रम राखेपछि कर्मचारीले आइतबार परेको इदको बिदालाई माया मार्नु परेको हो । स्थानीय सरकार र जिल्ला प्रशासन कार्यालयबीच समन्वय गर्न र सेवा प्रवाहमा हुने दुविधा हटाउन आइतबार चाँगुनारायण नगरपालिकासंग अन्तरक्रिया गरिएको सहायक प्रमुख जिल्ला अधिकारी माधवप्रसाद शर्मा घिमिरेले बताए ।
उक्त अवसरमा सिडिओ शर्माले जिल्ला प्रशासन कार्यालयबाट प्रवाह हुने सेवा प्रभावकारिताबारे प्रस्तुति दिदै सेवाग्राहीलाई सहजरुपले सेवा प्रवाह गर्न आपसी समन्वयमा जोड दिइन् । उनले जिल्ला प्रशासन कार्यालयले प्रवाह गर्ने सेवाको काम कारवाही र प्रक्रियाबारे प्रष्ट पार्दै चाँगुनारायणका सबै वडाले सेवाग्राहीका सिफारिसमा एकरुपता कायम गर्न प्रेरित गरेकी थिइन् । 
त्यसैगरी जिल्ला प्रहरी परिसरका प्रमुख रहेका एसपी शिवकुमार श्रेष्ठले अपराधको विद्यमान अवस्थाबारे प्रस्तुति पेश गर्दै त्यसको न्यूनिकरणको लागि चाँगुनारायण नगरपालिकाले खेल्नुपर्ने भूमिका बारे बताएका थिए । सशस्त्र प्रहरी बलका जिल्ला प्रमुख एसपी नरबहादुर रावत र नेपाली सेनाको जिल्लास्थित इन्द्रबक्स गणका प्रतिनिधिले जिल्लामा शान्ति सुरक्षाको अवस्था मजबुत पार्न चाँगुनारायण नगरपालिकासंग गरिएको अपेक्षाबारे बताएका थिए । 
कार्यक्रममा चाँगुनारायणका प्रमुख प्रशासकीय अधिकृतको नेतृत्वमा ९ वटै वडाका वडासचिवहरुको सक्रिय सहभागिता रहेको थियो । कर्मचारी बिदा माया मारेर उपस्थित कार्यक्रममा नगर प्रमुख जीवन खत्री र उपप्रमुख रमेश बुढाथोकी अनुपस्थित रहेका थिए । उक्त अवसरमा सबै वडाका वडा अध्यक्षहरूले भने सक्रियतापूर्वक सहभागिता जनाएका देखिन्थे । उनीहरुले वडाबाट सिफारिस पत्र दिँदा अपनाउनुपर्ने सावधानी बारे जानकारी लिनुका साथै वडामा शान्ति सुरक्षाको अवस्था र अपराध न्यूनीकरणमा प्रहरी प्रशासनबाट गरिएका प्रयासहरु बारे जिज्ञासा राखेका थिए । कार्यक्रम नवनिर्वाचित जनप्रतिनिधिका लागि उपलब्धिमूलक भएको चाँगुनारायण नगरपालिकाका प्रवक्ता एवं वडा नम्बर ८ का वडाध्यक्ष जनक खत्रीले जनाएका छन् । उनले यस्ताखाले कार्यक्रम आवधिकरुपमा नियमित हुनुपर्ने समेत आवश्यकता औल्याए ।