भक्तपुर, ३२ असार २०७९नेकपा (माओवादी केन्द्र) को सहायक संगठन वाइसीएल नेपालको भक्तपुर जिल्ला समन्वय समितिले नेपाल राष्ट्र बैंकका गभर्नर महाप्रसाद अधिकारीलाई पदमुक्त गर्न माग गरेको छ । भक्तपुर सिडिओ रुद्रादेवी शर्मा मार्फत प्रधानमन्त्री शेरबहादुर देउवा समक्ष पत्र पठाउदै गभर्नर अधिकारीलाई अविलम्ब पदमुक्त गर्न माग गरिएको हो ।
वाइसीएल नेपाल भक्तपुरका संयोजक नरेश रन्जित र इन्चार्ज दिनेश थपलियाद्वारा हस्ताक्षर गरिएको पत्रमा गभर्नर अधिकारीले नेकपा एमालेको अर्थ समितिमा रहेर पार्टीको इशारामा देशलाई टाट पल्टाउन खोजेको आरोप लगाइएको छ ।
प्रेषित पत्रमा राष्ट्र बैंकको प्रमुख पदमा बसी पार्टीको अर्थ विभागमा रहेर राष्ट्रको भन्दा पनि पार्टीको काममा बढी सक्रिय र दलको प्रभावमा परी दल विशेषको संंगठनात्मक जिम्मेवारी पदमा बसेर मुलुकको अर्थतन्त्र तहसनहस पर्ने प्रयास गर्नु र नेपाल श्रीलंका जस्तो हुँदैछ भनेर जनमानसमा त्रासको वातावरण सिर्जना गर्नु गभर्नरको पदीय मूल्य मान्यताविरुद्ध भएको ठहर गरिएको छ ।
साथै पत्रमा नेपाल राष्ट्र बैंक ऐन २०५८ को दफा २१ को व्यवस्था प्रतिकूल हुने गरी भएको अधिकारीको नियुक्तिको समेत बदर गर्न माग गरिएको छ ।
अधिकारीको विवादास्पद अभिव्यक्तिकै कारण शेयरबजारमा पनि प्रतिूकल असर परिरहेको, देशमा महँगी बढेको, उद्योग धन्धा दराशायी भएको र देश श्रीलंका बन्नेजस्तो गैर जिम्मेवार अभिव्यक्ति दिदै गभर्नरले जनमानसमा त्रास फैलाउदै हिडेको समेत कारणले उनलाई पदमुक्त गर्न प्रमुख जिल्ला अधिकारीमार्फत् प्रधानमन्त्रीलाई अनुरोध गरिएको वाइसीएल भक्तपुरका संयोजक नरेश रन्जितले पुष्टि गरेका छन् ।