भक्तपुर, १ साउन २०७९आजबाट डोलेश्वर र आशापुरी महादेव मन्दिरमा एकमहिने साउने मेला शुरु भएको छ । चन्द्रविनायक गणेश मन्दिरदेखि केदारनाथको शिर मानिने डोलेश्वर मन्दिरसम्म कलश यात्रा गरी मेला शुरु भएको हो ।
आजदेखि सुरु भएको मेलामा भक्तपुर, ललितपुर, काठमाडौं र काभ्रेपलाञ्चोकका विभिन्न क्षेत्रमा बसोवास गर्दै आएका दर्शनार्थीको घुइँचो लाग्ने गरेको डोलेश्वर महादेव संरक्षण तथा विकास समितिका वरिष्ठ उपाध्यक्ष किरण थापाले जानकारी दिए । मेलामा संकलित रकम मन्दिरको गुरुयोजना निर्माणमै खर्च गरिने उनले बताए ।
त्यसैगरी सूर्यविनायक नगरपालिका–८ मै रहेको आशापुरी महादेव मन्दिरमा पनि आजदेखि एकमहीने मेला शुरु भएको छ । आशापुरी महादेव मन्दिरमा साउनमा मेला भरेमा मनले चिताएको पुग्ने जनविश्वास रहँदै आएको छ । छोराको चाहना गर्ने दम्पतीले कामना गरेमा पुग्ने जनविश्वास रहेको स्थानीयवासी बताउछन्। विशेषगरी डोलेश्वर महादेवलाई केदानाथको शिर घोषणा गरिएपछि त्यहाँ आएका भक्तजन डोलेश्वरबाट चार किमी परको आशापुरीसम्म जान थालेका छन् ।