भक्तपुर, ६ साउन २०७९नेपाल मजदुर किसान पार्टीका सांसद प्रेम सुवालले नेपालको नागरिकता समस्या समाधान गर्न खुला सीमा बन्द गर्नुपर्ने बताएका छन् ।
आज शुक्रवारको प्रतिनिधि सभा बैठकमा बोल्दै सांसद सुवालले यस्तो बताएका हुन् । नेपालीसँग विवाह गरेका महिला वा पुरुषलाई २० वर्षपछि नेपालको भाषा र संस्कृतिबारे लिखित र अन्तर्वार्ता परीक्षा उत्तीर्ण गरेमा नेपालको कृत्रिम नागरिकता दिनुपर्ने उनले बताए । यस्तै सांसद सुवालले नागरिकता विधेयकलाई फास्ट ट्र्याक बाट पारित गर्नु देशको हितमा नभएको बताए । नागरिकता विधेयक फास्ट ट्र्याक बाट पारित गर्न खोज्नु देशको हितमा नभएको उनको भनाइ छ ।उनले नागरिकता विधेयकलाई सम्बन्धित समितिमा पठाउनुपर्ने बताए ।
नेपालीले विदेशीसँग विवाह गर्न निरुत्साहित गर्नुपर्ने सांसद सुवालको भनाइ छ । आमा र बुबा दुवै वंशजको नेपाली नागरिकका छोराछोरीलाई मात्र वंशजको नेपाली नागरिकता दिनुपर्ने उनले बताए । जन्मको आधारमा दिएको नागरिकता विदेशीले पनि पाएकाले छानबिन गरी खारेज गर्नुपर्ने उनको भनाइ छ ।