भक्तपुर, ९ साउन २०७९नेपाली कांग्रेस सूर्यविनायक नगर समितिले आफ्ना कुनै वडा इकाइ सभापति र कार्यकर्ता अन्य अन्य दलमा प्रवेश नगरेको स्पष्ट पारेको छ ।
केही सञ्चारमाध्यममा कांग्रेसका वडा इकाइ सभापतिसहित सिंगो कार्यसमिति एमालेमा प्रवेश गरेको समाचार आइतबार बाहिर आएको थियो । सो समाचार प्रकाशित भएकोप्रति ध्यानाकर्षण भएको जनाउँदै कांग्रेस सूर्यविनायकले आफ्ना कुनै नेता कार्यकर्ता एमालेमा प्रवेश नगरेको दाबी गरेको हो ।
कांग्रेस सूर्यविनायक नगर सभापति निशान ढुंगेलले प्रेस विज्ञप्ति जारी गर्दै एमाले प्रवेश गरेका भनिएका राजेन्द्र त्वातीलाई पार्टीले कारवाही गरी साधारण सदस्यबाटसमेत नरहने गरि यस अघि नै निस्कासन गरिसकेको जानकारी दिए ।
पार्टीले कारवाही गरिसकेका नेता कार्यकर्तालाई कांग्रेसकै नेता कार्यकर्ता जस्तो गरी प्रचार गरिएको समाचारप्रति कांग्रेसले आपत्तिसमेत जनाएको छ । पार्टीले कारबाही गरिसकेका जोकोहीलाई स्वतन्त्र बस्ने वा अन्य दलमा जाने छुट भएको जनाउँदै विज्ञप्तिमा भ्रमको राजनीति नगर्न एमालेलाई चेतावनीसमेत दिइएको छ । कांग्रेस सूर्यविनायकका प्रवक्ता रमेश खड्काले एकतर्फी समाचार प्रकाशन गरिएको आरोप लगाउदै समाचार प्रकाशन पूर्व कांग्रेस कार्यकर्ता हुन् वा होइनन् भन्ने बारे जानकारी समेत नराखी समाचार प्रकाश्न हुनु दुखद भएको दावी गरे । उनले यसबाट सञ्चार क्षेत्रकै विश्वसनीयता गुम्ने हुँदा आगामी दिनमा सचेत भएर समाचार प्रकाशन प्रशारण गर्न समेत अपिल गरे ।