वर्षै पिच्छे परनिर्भता वढ्दै गएको बेला ग्रिल तथा स्टील व्यवसायको क्षेत्रमा भने नेपाल आत्मनिर्भर रहेको छ । यसलाई अझ प्राथमिकता दिने हो भने विदेश निर्यात पनि सम्भब भएको व्यवसायीहरुले बताएका छन् ।

ग्रिल तथा स्टील व्यवसायी महासंघ नेपालका केन्द्रिय अध्यक्ष मोहन कटुवालले ग्रिल तथा स्टील क्षेत्रमा नेपाल झण्डै आत्मनिर्भर रहेको बताए । सरकारले केही जोड गरी सहयोग गर्ने हो भने विदेश निर्यातमा कुनै समस्या नभएको उनको भनाई छ । ‘केही वर्षअघिसम्म नेपाल ग्रिल तथा स्टीलमा परिनिर्भर थियो । भारत तथा चीनबाट आयात गर्नुपर्ने अवस्था थियो, उनले भने, ‘तर अव हामी झण्डै आत्मनिर्भर छौ र केही बल गरे निर्यात पनि गर्न सक्छौं ।’

तथ्यांक अनुसार ग्रिल तथा स्टील व्यवसाय क्षत्रमा देशभर ११ हजार भन्दा वढी उद्योगहरु रहेका छन् । ती उद्योगहरुले वार्षिक रुपमा तीन हजार युवायुवतीहरुलाई सीप सिकाएर एक लाख ६० हजार व्यक्तिलाई प्रत्यक्ष रोजगारी दिंदै आएको छ । वार्षिक रुपमा ६५ अर्व बराबरको मेटल फेव्रिकेटिंग सम्वन्धी कामहरु भइरहेको छ । यो उद्योगमा अझै पनि दक्ष जनशक्तिको अभाब छ, अध्यक्ष कटुवाल थप्छन्, हामीले यसमा काम दिएर कति धेरै युवाहरुलाई विदेश जानबाट रोकेर यो काममा लगाइरहेका छौं । दक्ष जनशक्तिको अभाब भएका कारण महासंघले विभिन्न प्रशिक्षणहरु दिंदै आएको उनले जनाए ।
यस्तो सम्भावनायुक्त व्यवसाय भए पनि सरकारले आफना समस्याहरुतिर ध्यान दिन नसकेको आरोप उनीहरुको छ । उनीहरुले ग्रिल तथा स्टील व्यवसायतिर समस्याको पहाड रहेको बताए । यसका लागि सरकारले सहयोग गर्नुपर्ने माग व्यवसायीहरुको थियो ।

महासंघका वरिष्ठ उपाध्यक्ष निरञ्जनकुमार श्रेष्ठले यो क्षेत्रको सम्वद्र्धन र प्रबद्र्धनको लागि राज्यले उचित संरक्षणतिर ध्यान नदिंदा व्यवसायीहरु निराश रहेको बताए । भूकम्पमा खुला आकाशमुनि वस्न बाध्य मानिसहरुलाई फलामको अस्थायी भुईघर बनाएर दिने, वाढीपीडितहरुलाई राहत सामाग्री उपलव्ध गराउनेलगायतका सामाजिक कार्य पनि आफूहरुले गर्दै आएको जानकारी गराए ।