त्रिभुवन विश्वविद्यालय प्राध्यापक संघको सानोठिमी क्याम्पस इकाई समितिले नयाँ नेतृत्व पाएको छ । प्राडा माधव श्रेष्ठको नेतृत्वमा ११ सदस्यीय नयाँ कार्यसमिति निर्वाचित भएको हो ।

सभापति निर्वाचित भएका प्राडा श्रेष्ठ नेकपा(माओवादी केन्द्र) निकट रहेको राष्ट्रिय प्राध्यापक संगठनमा आवद्ध प्राध्यापक हुन् । सभापति प्राडा श्रेष्ठ रहेको कार्यसमितिको उप सभापतिमा भने नेपाली कांग्रेस निकट प्रजातन्त्रवादी प्राध्यापक संघका प्राध्यापक  शिव अर्याल निर्वाचित भएका छन् । सचिवमा अम्बरजंग लिम्बु, उपसचिव नरहरि आचार्य र कोषाध्यक्षमा लक्ष्मी जि.सि निर्वाचित भएका उक्त क्याम्पसमा प्राध्यापक समेत रहेका राष्ट्रिय प्राध्यापक संगठनका नेता उमेश लम्सालले जनाएका छन् । उनीहरू सबै राष्ट्रिय प्राध्यापक संगठनमा आवद्ध हुन् ।

त्यसैगरी सदस्यहरुमा होमनाथ दाहाल, भुवन बोहरा, लोकनाथ तिमिल्सिना, रुद्रहरी ज्ञवाली, प्रतिमा थपलिया र ईश्वरी शर्मा निर्वाचित भएका बताइएको छ । विद्यार्थी नेता रेशमलाल श्रेष्ठले दिएको जानकारी अनुसार क्याम्पसका ५४ प्राध्यापकले गोप्य मतदानबाट प्राध्यापक संघको कार्यसमिति यस अघि नै निर्वाचित गरेका थिए । बिहीबार सो कार्यसमितिले पदाधिकारी टुंगो लगाएको हो ।