चाँगुनारायण, ११ भदौ २०७९भक्तपुरमा नेकपा (माओवादी केन्द्र) को चाँगुनारायण नगर समितिले पनि दर खाने कार्यक्रम सम्पन्न गरेको छ । नगर पार्टीको महिला बिभागको समन्वयमा तीज विशेष कार्यक्रम अन्तर्गत नगर समितिले दर खाने कार्यक्रम सम्पन्न गरेको हो । 
नजिकिएको तीज पर्वको अवसर पारेर शुक्रवार पार्टी संग आवद्ध रहेका महिला सदस्यहरुलाई दर खुवाइएको नगर अध्यक्ष नरेश खड्काले जनाएका छन् । 
कार्यक्रममा शुभकामना आदानप्रदान गरिनुका साथै महिलाहरुले मात्र मनाउने तीज पर्वलाई कसरी महिला सशक्तीकरण संग जोड्ने भन्ने विषयमा छलफल समेत गरिएको नगर सचिव चण्डिका लामिछानेले जानकारी गराइन । 
चाँगुनारायणका करिब ३ सय महिला कार्यकर्ताको सहभागिता रहेको कार्यक्रममा पार्टीका पोलिट्ब्युरो सदस्य एवं जिल्ला इन्चार्ज दिलिप प्रजापति, केन्द्रीय सदस्यहरु देवेन्द्र श्रेष्ठ, डिपी ढकाल र प्रतिमा श्रेष्ठ त्यसैगरी जिल्ला संयोजक सुनिल बासु लगायतको आतिथ्यता रहेको थियो । 
उक्त अवसरमा बैचारिक बहसका साथै नृत्य, गायन लगायत विभिन्न मनोरञ्जनात्मक खेलहरु समेत खेलिएको र खेलमा उत्कृष्ट हुनेहरुलाई पुरस्कार पनि प्रदान गरिएको आयोजकले जनाएको छ ।