भक्तपुर, १३ भदौ २०७९मध्यपुर थिमि नगरपालिकाले एकैसाथ ३ वटा वडामा शहरी स्वास्थ्य केन्द्र मार्फत सेवा शुरु गरेको छ । सोमबार एकैदिन ३ वटा वडामा शहरी स्वास्थ्य केन्द्र मार्फत निशुल्क स्वास्थ्य सेवा शुरु भएको हो ।
मध्यपुर थिमि नगरपालिकाको वडा नम्बर २, ३ र ५ मा शहरी स्वास्थ्य केन्द्र स्थापना भएको छ । नगर प्रमुख सुरेन्द्र श्रेष्ठ र उपप्रमुख विजय कृष्ण श्रेष्ठले सोमबार बिहान एक विशेष कार्यक्रमका बीच शहरी केन्द्रको संयुक्त्रुपमा उद्घाटन गरेका हुन् । उक्त अवसरमा प्रमुख प्रशाशाकीय अधिकृत, वडाध्यक्ष लगायत जनप्रतिनिधि,कर्मचारी एवं स्थानीय अगुवाहरुको उपस्थिति रहेको थियो ।
उपप्रमुख विजय कृष्ण श्रेष्ठले बताए अनुसार नागरिकलाई घरआँगनमा नै स्वास्थ्य सेवाको पहुँच पुर्याउने उद्देश्यले केन्द्रको स्थापना गरिएको हो ।आन्तरिक व्यवस्थापनमा नगरपालिकाकै श्रोत र कर्मचारी व्यवस्थापन गरी यसलाई सञ्चालनमा ल्याइएको उनको भनाइ छ ।
शहरी स्वास्थ्य केन्द्रले स्थानीयलाई निशुल्क सेवा दिने इन्चार्ज सुदिप मिश्रले जानकारी गराएका छन्। केन्द्रमा उपलब्ध सेवा उपलब्ध गराउने र थप सेवा आवश्यक परे नगर अस्पताल रिफर गरिने उनले जानकारी गराए ।