नेकपा माओवादी केन्द्रका अध्यक्ष पुष्पकमल दाहाल प्रचण्डले गठबन्धनमा संघ र प्रदेशको निर्वाचन क्षेत्र तोकेरै सिट बाँडफाँट हुने बताएका छन् । शुक्रबार सुर्खेत पुगेका प्रचण्डले सिट बाँडफाँटको विषयमा बाहिर चर्चा भएजस्तो गठबन्धनभित्र कुनै असहमति नभएको बताए ।

उनले प्रदेश र क्षेत्रसहित एकैपटक टुंगो लगाउने एक खालको सहमति भएको र त्यसलाई प्रभावकारी कसरी बनाउने भन्नेतिर नै छलफल केन्द्रित रहेको पनि बताएका छन् । उनका अनुसार हिजो अबेरसम्म बसेर गठबन्धनमा संख्या सहमतिको नजिक पुर्याएको र अब एकैपटक प्रदेश र क्षेत्रको पनि टुंग्याउने गरी आज दिनभरी छलफल हुने छ।

एउटाले संघ लिएमा अर्को प्रदेशमा लिएर सन्तुलन मिलाएर जाने विषयमा पनि छलफल उनले जानकारी दिए । अर्को एकलै जित्ने स्थानमा पनि अन्य दललाई दिएर प्रदेश र संघमा १६५ नै जित्ने गरी छलफल भएको उनले बताए ।