आजदेखि दसैका लागि नयाँ नोट साँट्न पाइने भएको छ । बैंक तथा वित्तीय संस्थाबाट सर्वसाधारणले नोट साट्न सक्नेछन् । हाललाई काठमाडौं उपत्यकाभित्रमा यस्तो व्यवस्था गरिएको छ । उपत्यकाबाहिर भने असोज २ देखि नोट साट्न पाइनेछ ।

नेपाल राष्ट्र बैंकले गत बिहीबार देखि नै बैंकहरुमार्फत बजारमा नयाँ नोट पठाउन सुरु गरेको थियो । एक पटकमा एक व्यक्तिले १८ हजार ५०० रुपैयाँसम्म नयाँ नोट साँट्न पाउने छन् ।

सर्वसाधारणले राष्ट्र बैंकको कार्यालय, वाणिज्य बैंक, विकास बैंक र फाइनान्स कम्पनीहरुबाट नयाँ नोट साँट्न सक्नेछन् । ५, १०, २०, ५० र १०० रुपैयाँका नोट सटहीको व्यवस्था मिलाइएको केन्द्रीय बैंकको भनाई छ । यो सुविधा असोज ७ गतेसम्म कायम रहनेछ ।