९ असोज २०७९नेकपा(एकीकृत समाजवादी) का भक्तपुर जिल्ला अध्यक्ष श्याम सुन्दर बस्नेतको घरमा पुगी परिवारलाई आतंकित पार्ने समूह नसमातिएको विरोधमा प्रदर्शन भएको छ । प्रदर्शनकारीहरुले आइतवार जिल्ला प्रशासन कार्यालय भक्तपुर परिसरमा प्रदर्शन गरेका हुन् ।
एकीकृत समाजवादीका जिल्ला नेताहरु र अध्यक्ष बस्नेतका शुभचिन्तकहरु प्रदर्शनमा सहभागी भएका थिए । उनीहरुले शान्तिसुरक्षा कायम गर्नुपर्ने, जनताको जिउधनको रक्षा गर्नुपर्ने, दोषीलाई तत्काल पक्राउ गर्नुपर्ने, सत्यतथ्य सार्वजनिक गर्नुपर्ने र संलग्न सबैलाई कानुनी कारवाही गर्नुपर्ने लगायत माग राखेका छन् ।
भदौं २५ गते बिहान ३ बजे एक अराजक समूह डाका शैलीमा अध्यक्ष बस्नेतको गठ्ठाघर स्थित घरमा पुगेका थिए । आफैं ढोका फोरेर पसेको उक्त समूहले परिवारका सदस्यलाई सांघातिक आक्रमण गरेका र बस्नेतलाई खोज्दै उनी नभेटीएपछि धाकधम्की दिंदै निस्किएका बताइएको छ । उक्त घटनाबारे प्रहरीलाई जाहेरी दिएपनि कुनै कारवाही नभएको र २ साता बितिसक्दा पनि ५-६ जनाको उक्त समूहका एक जना पनि पक्राउ नपरेको प्रति प्रदर्शनकारीहरुले आक्रोश प्रकट गरेका छन् । उनीहरुले आइतवार प्रमुख जिल्ला अधिकारी रुद्रादेवी शर्मा समक्ष ज्ञापन पत्र प्रस्तुत गर्दै दण्डहीनता अन्त्य हुनुपर्नेमा जोड दिए ।