भक्तपुर, १ कार्तिक २०७९छिमेकी मित्रराष्ट्र इस्लामिक गणराज्य पाकिस्तानको एक प्रतिनिधि टोलीले भक्तपुर नगरको अवलोकन भ्रमण गरेको छ । स्वात स्थानीय सरकार प्रमुख रहेका मेयर शाहीद अली सहितको प्रतिनिधिमण्डल टोलीले भक्तपुर नगरको अवलोकन भ्रमण गरेको हो ।
प्रमुख सुनिल प्रजापतिले मंगलबार २० सद्स्यीय उक्त टोलीलाई भादगाउँले टोपी लगाइदिएर नगरपालिकामा स्वागत गरेका थिए । स्वागत कार्यक्रममा बोल्दै प्रमुख प्रजापतिले जनप्रतिनिधिहरुको भ्रमणहरुको आदानप्रदानले दुई देशको मित्रतालाई अझ प्रगाढ बनाउने विश्वास व्यक्त गर्दै नेपाली जनता र पाकिस्तानी जनताले भोग्दै आइरहेको समान किसिमका समस्या समाधानमा समेत यसले मद्दत मिल्ने बताए ।
प्रमुख प्रजापतिले नेपाल मजदुर किसान पार्टी वैज्ञानिक समाजवाद स्थापना गर्ने उद्देश्यले स्थापना भएको कम्युनिष्ट पार्टी भएको र सोही पार्टीबाट सबै जनप्रतिनिधि निर्वाचित भएको भन्दै पार्टीको नीति अनुरुप नगरपालिकाले समाजवादको अभ्यास गरिरहेको जानकारी गराए ।
प्रमुख प्रजापतिले विकास निर्माण र सम्पदा संरक्षणको काम नगरपालिकाले स्थानीय जनता परिचालन गरी गर्दै आएको र स्थानीय जनतालाई रोजगारीको सृजना, संरचनामा जनताको अपनत्व र गुणस्तरीय निर्माणकार्यका कारण विकास निर्माणको काम सफलतापूर्वक सञ्चालन गर्न सम्भव भएको बताए । उनले उत्पादनका साधनहरु सामाजिकीकरण गर्ने, शिक्षा र स्वास्थ्य उपचारको जिम्मेवारी राज्यले लिनुपर्ने मान्यता अनुसार जनप्रतिनिधिहरुले काम गर्दै आइरहेका जानकारी गराए ।
उक्त अवसरमा पाकिस्तानको स्वात नगरका मेयर शाहीद अलीले भक्तपुर नगरले गरेको सौहार्दपूर्ण स्वागतको लागि धन्यवाद ज्ञापन गर्दै नगरपालिकाको सेवा प्रवाह र संगठन स्वरुप तथा कार्यशैलीबाट आफूहरु निकै प्रभावित भएको भनेका थिए । नेपाल–पाकिस्तानबीचको सम्बन्ध अगामी दिनहरुमा अझ सुमधुर रहने विश्वास प्रकट गर्दै उनले भक्तपुर भ्रमण निकै उत्साहप्रद र उपलब्धीपूर्ण भएको प्रतिक्रिया दिए ।
कार्यक्रममा पाकिस्तानका प्रतिनिधिहरूले भक्तपुरको साक्षरताको अवस्था, भक्तपुर नपाबाट सञ्चालित कलेज तथा अन्य संघ संस्थाहरुमा महिला सहभागिता, नगरपालिकाको प्रशासनिक संगठन संरचना, भक्तपुर नपाको स्रोत तथा बजेट व्यवस्थापन र भक्तपुर नपा र देशका अन्य स्थानीय तहहरुबीचको अन्तरसम्बन्धबारे जिज्ञासाहरु राखेका नगरपालिकाले जनाएको छ ।
उक्त अवसरमा भक्तपुरकी उपप्रमुख रजनी जोशी, वडाध्यक्ष रवीन्द्र ज्वाख्व, श्यामकृष्ण खत्री लगायतको उपस्थिति रहेको थियो । त्यसैगरी पन्जाब स्थानीय सरकार एकेडेमीका निर्देशक नजिब इस्लाम, स्थानीय सरकार र समुदायका लागि काम गर्दै आएका संघसस्थाका प्रतिनिधिहरु फारुक अहमद,अर्सनल अली लगायत खैबर पख्तुनख्वा र पन्जाब प्रान्तमा सञ्चालित जी.आई.जेड. पाकिस्तानको स्थानीय सरकार सहयोग कार्यक्रमका कर्मचारी र स्थानीय सरकारका प्रतिनिधिहरू उपस्थित रहेका थिए ।
उक्त टोलीलाई उपप्रमुख जोशीले भक्तपुर नगरपालिकाद्वारा सञ्चालित ख्वप कलेज, ख्वप मावि, ख्वप अस्पताल, ख्वप इन्जिनियरिङ तथा ख्वप कलेज अफ इन्जिनियरिङ कलेजको स्थलगत अवलोकन भ्रमण गराएकी थिइन् ।