राष्ट्रपति विद्यादेवी भण्डारीले एपी वान टेलिभिजनका लागि दिएको अन्तर्वार्ताको प्रसारण दुई सातासम्म रोकिएको छ ।

टेलिभिजनका प्रधान सम्पादक तथा कार्यक्रम ‘तमसोमा ज्योतिर्गमय’का प्रस्तोता टीकाराम यात्रीसँगको अन्तर्वार्ताको प्रसारण दुई पटक रोकिएको हो ।

प्रस्तोता यात्रीले मंसिर २ गते दुई वटा प्रोमो फेसबुकमा सार्वजनिक गर्दै त्यही दिन राती ९ बजे अन्तर्वार्ता प्रसारण हुने जानकारी गराएका थिए ।

प्रोमो सार्वजनिक भएलगत्तै मौन अवधिमा राष्ट्रपतिको अन्तर्वार्ता प्रसारण वाञ्छनीय नहुने सुझाव प्राप्त भएपछि शुक्रबारका लागि तय भएको प्रसारण स्थगित गरिएको विषय प्रस्तोता यात्रीले फेसबुकमार्फत सार्वजनिक गरे ।

‘हामीले प्रोमो सार्वजनिक गरेलगत्तै निर्वाचन आयोग एवं विभिन्न दलका शीर्ष नेतृत्व तहबाट यसबारे चासो व्यक्त भएको र निर्वाचन अवधिको स्थिर समयमा राष्ट्रपति ज्यूको अन्तर्वार्ता प्रशारण वाञ्छनीय नहुने सुझाव हामीलाई प्राप्त भएका कारण उक्त अन्तर्वार्ता निर्वाचनको मतदानपछि आइतबार राति मात्र प्रसारण गरिने जानकारी गराउदछौं,’ यात्रीले लेखेका थिए ।

यात्रीले भनेबमोजिम उक्त अन्तर्वार्ता मंसिर ४ गते राती प्रसारण हुनुपर्ने थियो । तर हालसम्म पनि उक्त अन्तर्वार्ता प्रसारण भएको छैन । राष्ट्रपतिको अन्तर्वार्ता दुई पटक रोकिएर अहिलेसम्म प्रसारण नहुनुको कारणबारे सेतोपाटीले यात्रीसँग जिज्ञासा राखेको थियो ।

निर्वाचन आयोगको ध्यानाकर्षणपछि प्रसारण रोकिएको र निर्वाचनको सम्पूर्ण परिणाम सार्वजनिक भएको दिन अन्तर्वार्ता प्रसारण हुने जवाफ दिए ।

‘निर्वाचन आयोगले ध्यानाकर्षण गराएपछि हामीले प्रसारण स्थगित गर्‍यौं । निर्वाचनको सम्पूर्ण परिणाम सार्वजनिक भएका दिन अन्तर्वार्ता प्रसारण गर्छौं,’ उनले भने ।

निर्वाचन आयोगले भने राष्ट्रपतिको अन्तर्वार्ता प्रसारण स्थगन गर्नका निम्ति एपी वान टेलिभिजनलाई कुनै पनि ध्यानाकर्षण नगराएको जवाफ दिएको छ । आयोगका प्रवक्ता शालिग्राम पौडेलले सेतोपाटीसंग भने, ‘राष्ट्रपतिको अन्तर्वार्ता प्रसारणमा आयोगले ध्यानाकर्षण गराएको भए मलाई जानकारी हुने थियो । यो विषय मेरो जानकारीमा नै छैन ।’

राष्ट्रपति कार्यालयले पनि अन्तर्वार्ता के कति कारणले रोकिएको हो भन्ने प्रष्ट जानकारी प्राप्त नभएको बताएको छ ।

‘अन्तर्वार्ताको प्रोमो पनि सार्वजनिक भयो तर प्रसारण रोकियो । हामीलाई निर्वाचन आयोगको ध्यानाकर्षणका कारण भनिएको थियो । हामीले आयोगमा बुझ्दा त्यस्तो पाएनौं । के कति कारणले रोकिएको प्रष्ट जानकारी प्राप्त भएको छैन,’ राष्ट्रपति विद्यादेवी भण्डारीका सञ्चार विज्ञ टीका ढकालले सेतोपाटीसँग भने ।

यात्रीले सार्वजनिक गरेको प्रोमोमा राष्ट्रपति भण्डारीले सक्रिय राजनीतिमा आउन सक्ने सम्भावनालाई नकार्न नसकिने खुलासा गरेकी थिइन् भने दासढुंगा प्रकरणबारे पनि चर्चा गरेकी थिइन् ।

सेतोपाटीबाट साभार ।