भक्तपुर नगरपालिका वडा नम्बर १ दुधपाटीस्थित लिटिल वर्ल्ड स्कूलका विद्यार्थीहरुले य:मरी बनाएका छन् । नेवा: समुदायको सास्कृतिक पर्व य:मरी पुन्हीको अवसरमा आयोजित फूड फेस्टिबलमा उनीहरुले य:मरीको स्टल राखेका हुन् ।

य: मरी नेवा समुदायमा मङ्सिर शुक्ल पूर्णिमाको दिन तयार पारिने एक प्रकारको विशेष रोटी हो । ‘यः’ भन्नाले नेपाल भाषामा सबैलाई मनपर्ने र ‘मरी’ भन्नाले रोटी भन्ने बुझिन्छ @। त्यसैले यमरीलाई मनपर्ने रोटी पनि भन्ने गरिन्छ ।

य:मरी विशेष गरी नयाँ धानको पिठो बाट बनाउने गरिन्छ । नयाँ धानको पिठोमा तिल र चाकुको मिश्रण राखेर तयार पारिन्छ र पानीको बाफले मात्र पकाउने गरिन्छ ।        लिटिल वर्ल्ड स्कूलका निर्देशक प्रकाश दुवालले विद्यार्थीलाई चाडपर्वका विशेष परिकारको जानकारी दिनुका अलावा पाककलाबारे ज्ञान दिन र घरको भान्सामा सहयोगका लागि प्रेरित गर्न फुड फेस्टिबल आयोजना गरेको बताए । उक्त अवसरमा कक्षा ७ र ८ का विद्यार्थीले य: मरीका अलावा मम, पानीपुरी लगायत पक्वान्न तयार पारी स्टल मार्फत वितरण गरेका थिए ।