सूर्यविनायक नगरपालिकाले उपयोगको दृष्टिकोणबाट जग्गा वर्गीकरण गर्दै सोको आधारहरु समेत सार्वजनिक गरेको छ । शुक्रवार पत्रकार सम्मेलन गर्दै नगर प्रवक्ता एवं वडा नम्बर ७ का वडाध्यक्ष रवीन्द्र सापकोटाले सोकुरा सार्वजनिक गरेका हुन् ।

प्रवक्ता सापकोटाले नगर क्षेत्र भित्र करिब १० प्रतिसत जमिनलाई कृषी क्षेत्रको रुपमा परिभाषित गरिएको प्रष्ट पारेका छन् । कृषी र गैर कृषी क्षेत्र तोक्दा मूख्य रुपमा सडक संजालको पहुँच र जमिनको विद्यमान अवस्थालाई आधार मानिएको उनको भनाइ छ । ”सामान्यतया बाटोको पहुँचमा नरहेको र खेती गरिदै आएको जमिनलाई कृषी क्षेत्र घोषणा गरिएको छ ।” उनले भने ।

स्थानीय भू उपयोग परिषदले भू उपयोग क्षेत्र वर्गीकरणका लागि मापदण्ड स्वीकृत गरेको जानकारी गराउदै प्रवक्ता सापकोटाले जग्गा वर्गीकरणका लागि १० आधार तय गरिएको र सोहीबमोजिम कृषी र गैर कृषी क्षेत्र कायम गरिएको उनले बताएका छन् ।

बसोबास योग्य गैर कृषी क्षेत्रलाई समेत व्यवसायिक र आवासीय क्षेत्रमा वर्गीकरण गरिएको छ । १० मिटर वा सो भन्दा बढी चौडाई भएको बाटोको दाया बायाँको जमिनलाई व्यवसायिक क्षेत्र भनिएको छ भने कम्तिमा ७५ मिटर पछाडिको जमिनलाई मात्र आवासीय बताइएको छ । १० मिटर भन्दा कमका बाटोमा रहेका जमिनलाई भने व्यवसायिकको परिभाषामा समेटिएको छैन ।

नगरपालिकाले व्यवसायिक क्षेत्रलाई औद्योगिक क्षेत्र तोक्न सक्ने समेत बताइएको छ ।

नेपाल सरकारले जग्गाको खण्डीकरण रोक्ने र कृषियोग्य जमिनको बचाव गर्ने उदेश्यले भूउपयोग ऐन २०७६ र नियमावली २०७९ जारी गरेको र सोको व्यवस्था बमोजिम एउटा प्रयोजनको भनी वर्गीकरण गरिएको जग्गा अर्को प्रयोजनमा उपयोग गर्न नपाइने बताइएको छ । यसका लागि स्थानीय सरकारलाई जग्गाको वर्गीकरण गरी नक्सामै देखाउन पर्ने व्यवस्था समेत गरिएको छ ।

सूर्यविनायक नगर प्रवक्ता रवीन्द्र सापकोटाले शुक्रवारको पत्रकार सम्मेलनमा यथाशीघ्र नगर क्षेत्रको भूमिको वर्गीकरण लाई नक्सा मार्फत नै प्रस्तुत गर्ने जानकारी गराउदै त्यसले जग्गाधनीलाई आफ्नो जग्गा कुन वर्गमा परेको छ भन्ने सजिलै थाहा हुने जिकिर गरे । उक्त अवसरमा नगरपालिकाका प्रमुख प्रशासकीय अधिकृत राजेन्द्र प्रसाद कडेल,वडा नम्बर २ का वडाध्यक्ष प्रदिप कार्की, प्रशासकीय अधिकृत राजेन्द्रप्रसाद नेपाल लगायतको उपस्थिति रहेको थियो ।