भक्तपुर, २८ मङ्सिर २०७९ काभ्रेपलाञ्चोकको बेथानचोक गाउँपालिका–४ स्थित चलाल गणेशस्थानमा भएको बस दुर्घटनामा परी ज्यान गुमाउनेको संख्या १८ पुगेको छ । मंगलबार साँझ ब्रतबन्धका लागि च्याल्टी पुगेर फर्किरहेको बा३ख ४३८५ नम्बरको रिजर्भ बस पल्टदा उक्त हताहती भएको हो ।
ज्यान गुमाउने १८ जनामध्ये १४ जनाको पहिचान खुलेको छ भने चार जनाको पहिचान अझै खुल्न सकेको छैन ।
स्थानीयले दिएको जानकारी अनुसार घटनास्थलमै १३ जनाको ज्यान गएको थियो भने बस चालक ललितपुरको महांकाल घर भइ पनौती ४ बस्ने २२ वर्षका सन्तोष तिमिल्सिना, बनेपा नगरपालिका १४ का ३९ वर्षका राजकुमार तामाङ, बनेपा-११ की ७९ वर्षकी निर्मला तामाङ, बनेपाकै ११ वर्षका योगेश तामाङ, ५० वर्षका अंकुर तामाङ, ४३ वर्षकी हेमा तामाङ, १० वर्षका पुष्कर तामाङ, २५ वर्षकी कोपिला तामाङ, ६ वर्षकी समिक्षा तामाङको मृत्यु भएको जिल्ला प्रहरी कार्यालय काभ्रेले जनाएको छ ।
यस्तै, काभ्रेको मण्डन देउपुर नगपालिका–१ बस्ने ३७ वर्षकी जेली तामाङ, धुलिखेल नगरपालिका ११ बस्ने ३० वर्षका बुद्ध तामाङ, बेथानचोक गाउँपालिका ५ की ३२ वर्षकी मञ्जु तामाङ, बनेपा १४ बस्ने २८ वर्षकी गीता श्रेष्ठ र तेमाल गाउँपालिका ८ बस्ने २७ वर्षीया टिकालक्ष्मी तामाङको मृत्यु भएको जिल्ला प्रहरीले जानकारी दिएको छ ।
प्रहरीका अनुसार २१ घाइतेको उपचार भइरहेको छ भने एकजना डिस्चार्ज भएका छन् । जिल्ला प्रहरी कार्यालय काभ्रेका प्रहरी प्रमुख प्रहरी उपरीक्षक चक्रराज जोशीका अनुसार सात जना घाइतेहरूको उपचार बनेपाको शीर मेमोरियल, नौ जनाको धुलिखेल अस्पतालमा र अन्य पाँच जनालाई भक्तपुर र काठमाडौँका विभिन्न अस्पतालमा उपचार भईरहेको छ । घाइतेको उपचारमा केही पनि कमि हुन नदिने सिडिओ हुमकला पाण्डेले बताए ।