भक्तपुर, ६ पुस २०७९ चाँगुनारायण नगरपालिकाले यही पुस ७ र ८ गते नगरस्तरीय कथा, कविता, निबन्ध लेखनका साथै वादविवाद प्रतियोगिता गर्ने भएको छ ।
पुस ७ गते चाँगुनारायण नगरपालिका–२ स्थित आजाद माध्यामिक विद्यालयमा हुने कथा लेखनको शिर्षक कार्यक्रम स्थलमा नै तय गरिने नगरपालिकाका शिक्षा, युवा तथा खेलकुद शाखा प्रमुख वीर बहादुर खड्काले बताए छन् । ‘वैदेशिक रोजगार भन्दा स्वदेशी व्यवसाय नै बेश’ शिर्षकको वादविवाद पुस ७ गते चाँगुनारायण नगरपालिका–७ बागेश्वरीस्थित श्रीकृष्ण माविमा हुने भएको छ ।
पुस ८ गते नगरपालिकाको सभाहलमा कविता लेखन र चाँगुनारायण नगरपालिका–८ स्थित महेन्द्रग्राम माविमा निबन्ध लेखन प्रतियोगिता हुनेछ । कविता र निबन्ध दुवै लेखनको शिर्षक भने तय भएको छैन ।
प्रतियोगितामा चाँगुनारायण नगरभित्रका १४ देखी २४ वर्ष उमेर समूहका युवाहरुको सहभागिता रहनेछ । एक जना सहभागीले कुनै एक विधामा मात्र सहभागिता जनाउन पाईनेछ ।
नगरपालिकालाई दिगो, समतामुलक, समावेशी विकासको गतिमा अघि बढाउँदैं समृद्ध नगर निर्माण गर्न र नगरपालिका क्षेत्र भित्र शैक्षिक गतिविधिहरुलाई प्रभावकारी तथा गुणस्तरीय बनाउन तथा युवाहरुमा रहेको प्रतिभा पहिचान गरी राष्ट्रिय तथा अन्तराष्ट्रिय पहिचान बढाउन सो प्रतियोगिता गर्न लागेको नगरप्रमुख जीवन खत्रीले बताए ।