भक्तपुर, १४ पुस २०७९उप प्रधानमन्त्री समेत रहेका गृह मन्त्री रवी लामिछानेले गृह मन्त्रालय सम्हालेपछि गृह प्रशासनले समेत लामिछाने शैली समातेको देखिएको छ । भक्तपुरकी सिडिओ रुद्रादेवी शर्माको नेतृत्वमा २ दिनमै भक्तपुरको आधा दर्जन बढी सरकारी कार्यालय छड्केमा परेका छन् ।
बुधवार देखि आकस्मिक रुपले सरकारी कार्यालयको अनुगमनमा उत्रिएको जिल्ला प्रशासन कार्यालय भक्तपुरले राधेराधेस्थित यातायात व्यवस्था कार्यालय र सल्लाघारीको यातायात सेवा कार्यालय त्यसैगरी नापी, भूमिसुधार र मालपोत कार्यालय लगायत ७ वटा सेवाग्राहीको अत्याधिक चाप रहने सरकारी कार्यालयहरुको आकस्मिक अनुगमन गरेको हो । श्रोतका अनुसार अनुगमनका क्रममा ७ वटा कार्यालयमा गरी १८ जना कर्मचारी बिना सूचना अनुपस्थित रहेका पाइएको छ भने २७ जनाले निर्धारित समयमा हाजिर गरेका छैनन् । त्यसैगरी कार्यालय पोशाकमा नरहेका १८ कर्मचारी पनि छड्केमा परेका छन् ।
श्रोतका अनुसार सिडिओ शर्माले कर्मचारीलाई सचेत गराउनुका साथै बिना सूचना अनुपस्थित रहेका १८ जना कर्मचारीलाई कारण देखाऊ आदेश जारी गर्दै लिखित जवाफ माग गरेकी छन् । त्यसैगरी उनी नेतृत्वको टोलीले सेवाग्राही संग सेवा प्रवाहको विषयमा समेत प्रतिक्रिया लिनुका साथै काममा आलटाल गर्ने आरोप लागेका केही कर्मचारीलाई निगरानीमा राखेको बताइएको छ ।
सिडिओ कार्यालयकी प्रमुख प्रशासकीय अधिकृत उर्मिला खतिवडाले भक्तपुर पोस्ट संग कुरा गर्दै जिल्लाका सरकारी कार्यालयहरुमा अनुगमन गरिएको पुष्टि गरेकी छन् । तर, उनले यो जिल्ला प्रशासन कार्यालयको नियमित प्रक्रिया भएको दावी गरिन । ” हामीले नियमित अनुगमन गरेका हौँ, सेवाग्राही मैत्री सेवा प्रवाह भए नभएको बारे अनुगमन गरिएको हो ।” उनले भनिन् ।
भक्तपुर सिडिओ रुद्रादेवी शर्माले कार्यालयहरुमा सूचना अधिकारीको व्यवस्था गरिएको, हेल्प डेस्क राखिएको, उजुरी पेटिका रखिएको, प्रतिक्षालयको व्यवस्था गरिएको, सरसफाई र खानेपानीको उचित प्रवन्ध मिलाइएको पाइएको बताउदै सेवा प्रवाह सन्तोषजनक रहेको जिकिर गरिन । ”हामीले कर्मचारीलाई तर्साउन अनुगमन गरेका होइनौं, कर्मचारीको मूल्यांकन र सेवा प्रवाह प्रभावकारी बनाउन अनुगमन गरिएको हो ।” उनले भनिन ।
काम गर्नेलाई प्रोत्साहन र नगर्नेलाई कारवाही गर्ने जिप्रकाको अधिकार र दायित्व भएको भन्दै सिडिओ शर्माले कार्यालय समयमा काम नगर्ने र सेवाग्राहीको काममा आलटाल गर्नेलाई कारवाही गर्न अनुगमन गरिराख्नु नपर्ने र सेवाग्राहीको गुनासो आए त्यस्ता कर्मचारीलाई तुरुन्तै कारवाही गरिने पनि जिकिर गरिन । उनले सेवाग्राहीको गुनासोलाई सम्बन्धित कार्यालयका गुनासो सुन्ने अधिकारीले सम्बोधन नगरे सिडिओ कार्यालयको ढोका सधै खुला रहेको बताउदै त्यस्ता गुनासा तत्काल सुनुवाई हुने समेत प्रतिक्रिया दिएकी छन् ।
अनुगमन गरिएका कार्यालयका कर्मचारीले भने आफूहरु काममा व्यस्त भएकाले हाजिर गर्न नपाएको र आकस्मिक अनुगमनमा परिएको बताएका छन् । अनुगमनका क्रममा सेवा प्रवाहलाई छिटो छरितो र प्रविधिमैत्री बनाउन सिडिओ शर्माले दिएको निर्देशनको पूर्ण पालना हुने कार्यालय प्रमुखहरुले प्रतिवद्धता प्रकट गरेका छन् ।