भक्तपुर, १९ पुस २०७९भक्तपुर प्रहरी प्रमुख रहेका जिल्ला प्रहरी परिसर भक्तपुरका एसपी प्रजित केसीले भक्तपुरस्थित अरनिको हाइवेका होटलहरुमा बेश्याबृत्ती भएको थाहा पाएमा सूचना दिन आग्रह गरेका छन् । प्रहरीले होटलहरुमा निगरानी गरिराखेको दावी गर्दै उनले बेश्याबृत्तीको सूचना पाए त्यस्ता संचालकलाई कार्वाही गर्न कुनै कसर बाकी नराख्ने बताएका हुन् । मंगलवार पत्रकारसंगको अन्तरक्रिया कार्यक्रममा अनावश्यक छापा हानेर होटल ब्यवसायलाई धरासायी नबनाउने प्रष्ट पार्दै एसपी केसीले बेश्याबृत्तीमा संलग्न भएको सूचनाका आधारमा मात्र आफूहरूले छापा हान्ने जानकारी गराएका छन् । उनले कुनैपनि ब्यवसायीबाट प्रहरीले अनुचित लाभ नलिएको जिकिर गर्दै प्रहरी संगठनलाई कुनै सहयोग गरेकै आधारमा कसैलाई पनि कानुन बिपरित कार्य गर्न उन्मुक्ति नहुने समेत बताए । उनले त्यस्तो कार्य भएमा जनता सामू लैजान पत्रकारलाई चुनौती समेत दिए । एसपी केसीले परिसर पत्रकारमैत्री रहेको जिकिर गर्दै सूचना लुकाउने आफ्नो कुनै नियत नरहेको स्पष्ट पारे । अपराध नियन्त्रणमा पत्रकारको भूमिका र महत्व बारे आफूले राम्ररी बुझेको बताउदै उनले कुनै पनि सूचना चाहिए रातको २ बजेसम्म आफूलाई सिधा सम्पर्क गर्न सकिने समेत जानकारी गराए । पत्रकार सूचनाको श्रोत भएको भन्दै उनले आफूसंग भएका सूचना दिएर अपराध नियन्त्रण र न्यूनीकरणमा सहयोग गर्न समेत पत्रकारलाई आग्रह गरेका छन् । एसपी केसीले भक्तपुरको आफ्नो ५ महिने कार्य अवधीमा जघन्य अपराधका घटनामा कमी आएको र सिभिलमा प्रहरी परिचालन गरि चोरी, दुर्ब्यसनी नियन्त्रणमा उल्लेख्य उपलब्धि हासिल गरेको खुलासा गर्दै फरार अपराधी समात्न विशेष अभियान नै चलाउदा हालसम्मकै रेकर्ड तोड्दै ५ महिनामै १ सय ६८ फरार अपराधी समात्न सफल भएको बताए । उनले आगामी दिनमा अपराध नियन्त्रणमा पत्रकार संग थप सुमधुर सम्बन्ध बनाएर एक अर्काको परिपुरकको रुपमा अघि बढ्ने प्रतिवद्धता समेत प्रकट गरे । उक्त अवसरमा परिसरका सूचना अधिकारी एवम् डिएसपी राजु पाण्डे त्यसैगरी जिल्ला प्रहरी बृत्त थिमिका प्रमुख रहेका डिएसपी हरिनन्दन चौधरी र जगाती बृत्तका प्रमुख रहेका डिएसपी राजकुमार श्रेष्ठले पत्रकार संग भएका सूचना र बिगतका अनुभवले अपराध अनुसन्धान र नियन्त्रणमा थप प्रभावकारी हुने बिश्वास ब्यक्त गरे । अन्तरक्रियामा नेपाल पत्रकार महासंघ भक्तपुरका अध्यक्ष जगतकृष्ण प्रजापतिले महासंघ प्रहरी र पत्रकारबीच पुलको रुपमा रही कार्य गर्न प्रतिवद्ध रहेको प्रष्ट पारेका थिए । अन्तरक्रियामा महासंघका सचिव संजीप शुभचिन्तक, सहसचिव हेमराज ढकाल, सल्लाहकार रमेश गिरी, त्यसैगरी सदस्य हरिसुन्दर छुकां, कृष्ण किसि, सुरेश सायजू,लक्ष्मी गारु, कृष्ण प्रजापति, आशिष पौडेल लगायतले सक्रियतापूर्वक सहभागिता जनाएका थिए । अन्तर क्रियाबाट प्रहरीले सूचना नदिने र पत्रकारले समाचार नदिने हो भने शान्ति सुरक्षाको विषयमा सर्वसाधारणले जानकारी पाउन नसक्ने भन्दै प्रहरी र पत्रकारबीचको पेशागत सम्बन्धलाई थप मजबुत र बिश्वासिलो बनाउन सहकार्य गर्नुपर्ने निष्कर्ष निकालिएको बताइएको छ ।