भक्तपुर, ११ माघ २०७९भक्तपुरको मध्यपुरथिमि- ३ गट्ठाघरमा सुविधा सम्पन्न सुपरस्पेशियालिटी सेवासहितको क्लिनिक संचालनमा आएको छ । छ लेन सडकसंगै रहेको आयु भवनबाट आयु सुपरस्पेशियालिटी क्लिनिक संचालनमा आएको हो ।
मंगलवार पत्रकार सम्मेलन गर्दै क्लिनिकका अध्यक्ष प्राडा सुरज बज्राचार्यले गठ्ठाघरमा सेवा शुरु गरिएको सार्वजनिक गरेका छन् । क्लिनिकमा गुणस्तरीय प्रयोगशाला र विशेषज्ञ चिकित्सक सहित २० वटा बिभागमार्फत सेवा प्रदान गरिने प्राडा बज्राचार्यले प्रष्ट पारे । यसको औपचारिक उद्घाटन भने यहि माघ १२ गते बिहीबार श्रीपञ्चमीको दिनबाट गर्ने उनले जानकारी गराएका छन् ।
क्लिनिकमा आन्तरिक चिकित्सा, आन्तरिक चिकित्साको विशेष सेवाहरू ग्यास्ट्रोन्टेरोलोजी, पल्मोनोलोजी, कार्डियोलोजी, बाथविज्ञान, न्यूरोलोजी र सामान्य शल्यक्रियाको सुविधा हुने किल्निकका अध्यक्ष प्राडा बज्रचार्यले बताए ।
ग्यास्ट्रो सर्जरी, ल्याप्रोस्कोपिक सर्जरी, अर्थोपेडिक शल्यक्रिया, स्पाइन सर्जरी, ट्रमा सर्जरी, बाल चिकित्सा ओर्थोपेडिक्स सर्जरी, आर्थोस्कोपिक शल्यक्रिया, प्रसूति तथा स्त्रीरोग/ इनभिट्रो फर्टिलाइजेशन र बाल रोग सेवा समेत उपलब्ध गराइएको उनले जानकारी गराएका छन् । त्यस्तैगरी प्राडा बज्रचार्यले दिएको जानकारी अनुसार फिजियोथेरापी,मनोचिकित्सा,डर्माटोलोजी,आँखा,दाँत र नाक,कान घाटी रोग उपचारको ब्यवस्था पनि मिलाइएको छ ।
७० वर्ष भन्दा माथिका जेष्ठ नागरिक, अपाङ्गता भएकाहरु र आजिवन सदस्यता लिनेहरुलाई सेवामा विशेष छुटको ब्यवस्था हुने ब्यवस्थापक बिकास थापाले बताए । उनले भक्तपुरलाई स्वास्थ्यको हब बनाउने क्लिनिकको उदेश्य रहेको जिकिर गरे । भक्तपुरबाट उपचारको लागि काठमाडौ जाने क्रम रोक्ने मात्र नभई काठमाडौका बिरामीलाई क्लिनिकमा आउने वातावरण बनाइने बताउदै उनले केही महिनामै यसको परिणाम देखिने दावी गरे । क्लिनिक नाफामूखी नभई स्वास्थ्य क्षेत्रमा नाम कमाएका चिकित्सक र ब्यवस्थापकहरुको समुहले सेवा र स्व-रोजगारको उदेश्यले संचालन गरेका बताइएको छ ।